رووداو دیجیتاڵ
دوای چوار رۆژ لە دابەزینی بەردەوام، ئەمڕۆ پێنجشەممە نرخی نەوت ئاراستەی بەرەو بەرزبوونەوە گۆڕی. سەرەڕای بەرزبوونەوەی ئەمڕۆ، هێشتا نرخی نەوت لە نزمترین ئاستی 6 مانگی رابردووی مامەڵەی پێوەدەکرێت.
نرخی نەوت کە لە چەند رۆژی رابردوودا بەهۆی سەپاندنی پێناسە گومرکییەکانی ئەمریکا لەسەر کەنەدا و مەکسیک دابەزینی بەخۆیەوە بینی بوو، رۆژی پێنجشەممە بەرزبووەوە.
ئەمڕۆ لەدوای کردنەوەی بازاڕەکانی ئاسیا، نرخی یەک بەرمیل نەوتی برێنت 42 سەنت بەرزبووەوە و بە 69 دۆلار و 72 سەنت مامەڵەی پێوەکرا.
نرخی یەک بەرمیل نەوتی سووکی تەکساسی ئەمریکاش 40 سەنت بەرزبووەوە و بە 66 دۆلار و 71 سەنت مامەڵەی پێوەکرا. نرخی نەوتی برێنت لە چوار کۆبوونەوەی پێشووی بازاڕدا بەڕیژەی 6.5٪ دابەزیبوو.
نرخی نەوتی سووکی تەکساسیش لەو ماوەیەدا بەڕێژەی 5.8٪ دابەزینی بەخۆیەوە بینی بوو و گەیشتبووە کەمترین ئاستی 6 مانگی رابردووی خۆی.
لە کاتێکدا دۆناڵد ترەمپ، پێناسە گومرکییەکانی سەر مەکسیک و کەنەدای خستەواری جێبەجێکردنەوە، بەرهەمهێنەرانی نەوتی ئەندام لە ئۆپێک پڵەس بۆ یەکەمجار لەدوای ساڵی 2022وە بڕیاریاندا نەوتی زیاتر بخەنەڕوو، ئەوەش نرخەکانی نەوتی دابەزاند.
دانییەل هاینێس، شرۆڤەکاری سەر بە بانکی نیوزلاندنی ئۆسترال رایگەیاند، "سیاسەتەکانی سەپاندنی پێناسی گومرکیی ترەمپ، خەریکە مەترسی لەسەر خواستی جیهانی بۆ نەوت دروستدەکات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ