نێچیرڤان بارزانی، سەرۆکی هەرێمی کوردستان و پەتریارک ئیگناتیۆس ئەفرامى دووەم، پەتریارکی کڵێسای سریانی ئۆرتۆدۆکس لە ئەنتاکیا
رووداو دیجیتاڵ
لە میونشن سەرۆکی هەرێمی کوردستان لەگەڵ پەتریارکی کڵێسای سریانی ئۆرتۆدۆکس لە ئەنتاکیا کۆبووەوە. پەتریارکەکە سوپاسی هەرێمی کوردستانی کرد بۆ پاراستنی کریستیانە ئاوارە و پەنابەرەکان.
لە چوارچێوەی بەشداریکردنی لە کۆنفرانسی ئاسایشی میونشندا، ئێواره‌ى ئەمڕۆ هەینی 14-02-2025 نێچیرڤان بارزانی، سەرۆکی هەرێمی کوردستان لەگەڵ پەتریارک ئیگناتیۆس ئەفرامى دووەم، پەتریارکی کڵێسای سریانی ئۆرتۆدۆکس لە ئەنتاکیا کۆبووەوە.
سەرۆکایەتیی هەرێمی کوردستان دەڵێت، هەردوولا دۆخی کریستیانەکانیان لە عێراق و سووریا و ئەو ئاستەنگانەی ئێستا رووبەڕوویان دەبنەوە تاوتوێ کرد؛ هەروەها باسيان له چۆنێتيى بەهێزکردنی هەوڵەکانی ئاشتی و پێکەوەژیان لەنێوان پێکهاتە ئایینی و نەتەوەییە جیاوازەکانی ناوچەکەدا كرد.
نێچیرڤان بارزانی جەختی لەسەر گرنگیی پێکەوەژیانی ئاشتییانە و پاراستنی مافەکانی کریستیانەکان و هەموو پێکهاتەکان کردەوە، ئاماژەی بە پابەندبوونی هەرێمی کوردستان کرد لە پشتگیریکردنی فرەیی ئایینی و کولتووری، بەهێزکردنی ژینگەیەکی لێبووردەیی و رێز له‌يه‌كگرتن.
وەکو لە راگەیێندراوەکەی سەرۆکایەتیدا هاتووە، پەتریارک ئیگناتیۆس ئەفرامى دووەم سوپاسی هەرێمی کوردستانی کردووە بۆ پاراستن و پشتگیریکردنی کریستیانە ئاوارە و پەنابەرەکان، ستایشی رۆڵی هەرێمی كوردستانى کرد وەکو نموونەیەک بۆ پێکەوەژیانی ئاشتیيانە لە ناوچەکەدا.
دۆخی سووریا و ئاستەنگە هەنووکەییەکانی ناوچەکە، لەگەڵ چەند پرسێکی دیکەی جێی بایەخی هاوبه‌ش، تەوەرێکی دیکەی کۆبوونەوەکە بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ