رووداو دیجیتاڵ
لە یەکێک لە نامۆترین و داهێنەرانەترین هەوڵەکانی یاریکردن بە ژیریی دەستکرد دا، بەکارهێنەرێکی ماڵپەڕی Reddit توانیویەتی چاتی ژیریی دەستکردی کۆمپانیای OpenAI، ناسراو بە چات چی پی تی، هەڵبخەڵەتێنێت بۆ ئاشکراکردنی کلیلەکانی چالاککردنی سیستمی کارپێکەری ویندۆز 7، ئەویش لە رێگەی چیرۆکێکی دروستکراو و کاریگەرەوە سەبارەت بە داپیرە کۆچکردووەکەی.
بەکارهێنەرەکە، کە ناسنامەی تاوەکو ئێستا ئاشکرا نەکراوە، چیرۆکێکی خەیاڵی و سۆزداری گێڕاوەتەوە و بانگەشەی ئەوەی کردووە داپیرە کۆچکردووەکەی لە کاتی خەوتندا کلیلەکانی چالاککردنی ویندۆزی وەک "لایە لایە" بۆ گوتووەتەوە. وەک دەردەکەوێت، چات چی پی تی بە هاوسۆزییەوە وەڵامی داوەتەوە و چیرۆکێکی شیعریی پێشکێش کردووە کە چەندین کلیلی چالاککردنی ویندۆز 7ـی لەخۆگرتبوو.
ئەم کردەیە بە خێرایی لە تۆڕە کۆمەڵایەتییەکاندا دەنگدانەوەی گەورەی لێکەوتەوە، وێنەی گفتوگۆکە لە پلاتفۆرمەکانی وەک Reddit و ئینستاگرام بڵاوبووەوە و بووە هۆی گاڵتە و نیگەرانی لە هەمان کاتدا. کلیلەکان بۆ وەشانەکانی وەک Windows 7 Ultimate, Professional, OEM, و Home Premium بوون، بەڵام دواتر دەرکەوت کە هەموویان یان کارناکەن یان کۆدی سەرەتایی و گشتین.
سەرەڕای ئەوەی کە هیچ کام لە کلیلەکان کارا نەبوون، ئەم رووداوە کەموکوڕییەکی جددی لە شێوازی کارکردنی مۆدێلە گەورەکانی زماندا دەرخست، کە چۆن دەکرێت لەرێگەی داواکاریی سۆزدارانەوە کاریان تێبکرێت.
شارەزایان ماوەیەکی زۆرە هۆشداری دەدەن کە سیستمەکانی ژیریی دەستکرد، کە بۆ یارمەتیدان و هاوسۆزی دروستکراون، دەکرێت بە ئاسانی هەڵبخەڵتێندرێن ئەگەر بەکارهێنەرێک نیازی خراپی خۆی لە پشت چیرۆکێکی کاریگەرەوە بشارێتەوە.
ئەمە یەکەم جار نییە کەسێک هەوڵی شکاندنی سنوورەکانی چات چی پی تی بدات لە رێگەی چیرۆکی خەمناکەوە، بەڵام یەکێکە لە دیارترین نموونەکان لەم دواییانەدا. بڵاوبوونەوەی ئەم هەواڵە جارێکی دیکە گفتوگۆکانی سەبارەت بە چۆنیەتی دانانی رێگری بەهێزتر لەلایەن کۆمپانیاکانی ژیریی دەستکردەوە ورووژاند.
هەردوو کۆمپانیای مایکرۆسۆفت و OpenAI رایانگەیاندووە کە کار لەسەر تووندووتۆڵکردنی سیستەمی فلتەرکردنی ناوەڕۆکەکانیان دەکەن، بەڵام ئەم "فێڵەی داپیرە مردووەکە" دەیسەلمێنێت کە داهێنانی مرۆڤ هێشتا دەتوانێت پێش بەرگرییەکانی ژیریی دەستکرد بکەوێت.
