رووداو دیجیتاڵ
خێزانێکی ئەمریکی داوای زیاتر لە 80 هەزار دۆلار لە ناسا دەکەن، دوای ئەوەی لە فلۆریدا پاشماوەیەکی بچووک لە ئاسمانەوە بە بانی ماڵەکەیان کەوت.
لەگەڵ زیادبوونی هاتووچۆی مرۆڤ بۆ بۆشایی ئاسمان، کێشەی پاشماوەی بۆشاییش زیادبووە، کە بریتییە لە پارچەی فڕێدراوی رۆکێت، کەشتی و مانگە دەستکردەکان.
دامەزراوەی یاسایی کرانفڵ سەمنەر دەڵێت، وەڵامی ناسا بۆ ئەم سکاڵایەی ئێستا لەسەری تۆمارکراوە، دەکرێت ببێتە بنەما و رێگەیەک بۆ یەکلاکردنەوەی سكاڵاکانی داهاتوو.
رۆژی 8ـی ئادار، لە شاری ناپلسی فلۆریدا، تەنێک کە کێشەکەی 700 گرام بووە، بە ماڵی ئەلێخاندرۆ ئۆتێرۆ کەوتووە و بانەکەی کونکردووە.
دواتر ناسا پشتڕاستیکردەوە، ئەوە پارچەی پاترییەکی وێستگەی بۆشایی ئاسمان بووە، کە ساڵی 2021 لە وێستگەکە فڕێدراوەتە دەرەوە.
ناسا چاوەڕێی کردبوو پێش ئەوەی پارچەکە بگاتە زەوی، شیببێتەوە و نەمێنێت، بەڵام ئاژانسە ئەمریکییەکە دەڵێت، بەشێکی پارچە پاترییەکە وەک خۆی مابووەوە و بەو شێوەیە بە بەرگەهەوای زەویدا دەربازی بووە.
یەکێک لە کوڕە بچووکەکانی خێزانەکە لە کاتی بەرکەوتنی پارچەکە بەر بانەکەیان، لە ماڵەوە بووە.
دامەزراوە یاساییەکە دەڵێت، ناسا ماوەی شەش مانگی لەبەردەستە تاوەکو وەڵامی سکاڵاکەیان بداتەوە.
میکا نگویەن وێرزی، پارێزەری خێزانەکە دەڵێت "بریکارەکانم داوا دەکەن قەرەبووی تەواویان پێ بدرێت لە بەرامبەر ئەو ترس و کاریگەرییەی ئەم رووداوە لەسەر ژیانیان هەیبووە."
پارێزەرەکە دەشڵێت "ئەوان سوپاسگوزارن کە هیچ کەس بەهۆی رووداوەکە بریندار نەبوو، بەڵام بە ئەستەم لێی رزگاربوون؛ ئەگەر بەریان کەوتبا، کارەسات دروست دەبوو."