رووداو - هەولێر
لە سەردانێكی لەناكاو و بێ ئاگاداری میدیاكان، ئەستێرەی جیهانی ئەنجێلینا جولی دوای گەیشتنی بۆ هەرێمی كوردستان سەردانی چەند كەمپێكی ئاوارەكانی رۆژئاوای كوردستانی كرد و لە كەمپی خانكێ كۆنگرەیەكی رۆژنامەوانی ئەنجام دا.
لەم كۆنگرە رۆژنامەوانییە، كە پەیامنێری تۆڕی میدیایی رووداو ئامادەی بوو، ئەنجێلینا جولی باڵیۆزی نیازپاكی نەتەوە یەكگرتووەكان گوتی: "هەرچی زووە دەبێ كاری جدی بۆ پاراستن و دوورخستنەوەی ئاوارەكان لە مەترسی ئەم جەنگە بكرێت، دەبێ رەوشی ژیانیان باشتر بكرێت و هاوكاری بكرێن".
هاتنی ئەنجێلینا جولی ئەستێرەو ئەكتەری هۆلیوود، لە میدیاكانی جیهاندا دەنگدانەوەی گەورەی دروستكردووە، هەروەك چۆن ئاژانسی پەنابەرانی سەر بە نەتەوەیەكگرتووەكان UNHCR بەمانشێتێكی گەورە لە یەكەم لاپەڕەی خۆیدا بڵاویكردووەتەوە، "ئەنجێلینا جولی بانگی كۆمەڵگای نێودەوڵەتی دەكات بۆ هاوكاری ئاوارەكانی كوردستان، كە لە هەرێمی كوردستانن".
ماڵپەڕی فەرمی ئەمڕۆی ئەمەریكا USA TODAY راپۆرتێكی ڤیدیۆیی لەسەر ئەم سەردانەی ئەنجێلینا بۆ هەرێمی كوردستان ئامادەكردووەو نووسیویەتی، "ئەكتەری هۆلیوود و نوێنەری نیازپاكی نەتەوەیەكگرتووەكان لە سەردانێكیدا بۆ لای ئاوارەكانی كەمپێك لە كوردستانی عێراق، داوای هاوكاری و باشتركردنی رەوشییان دەكات".
هەر سەبارەت بەهاتنی جولی بۆ هەرێمی كوردستان، ماڵپەڕی The Guardian ی بەریتانی باسی ئافرەتێكی كوردی كردووە، كە تووشی نەخۆشیی دەروونی بووە، بەپێی هەواڵی ئەم ماڵپەڕە جیهانییەش ئەم حاڵەتە ئەو ئەستێرەیەی زۆر خەمبار كردووە.
ماڵپەڕی US Magazine ی ئەمەریكی، بەمانشێتێكی گەورە لەسەر یەكەمین لاپەڕەی خۆی نووسیویەتی، "جولی بەو سەردانەی بۆ هەرێمی كوردستان دڵی ئاوارەكانی تاڕادەیەك خۆشكرد، داوای هاوكاریشی بۆ باشتركردنی بارودۆخیان لە كۆمەڵگەی نێودەوڵەتی كردووە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ