پۆلیسی ئەڵمانیا بۆ رووداو: سزای تووند بۆ قاچاخچییەکان هەیە

کریستین ماول لە نووسینگەی رۆژنامەڤانیی بەڕێوەبەرایەتیی پۆلیسی فیدراڵیی ئەڵمانیا، ئەمڕۆ دووشەممە، 27ـی تشرینی یەکەمی 2025 لە وەڵامی پرسیاری کەهی مەحموود، ئێدیتۆر لە دێسکی نێودەوڵەتیی تۆڕی میدیایی رووداو سەبارەت بە رێوشوێنەکانی تایبەت بە رێگریکردن بە بازرگانیکردن بە مرۆڤەوە و قاچاخچێتی رایگەیاند، هەنگاوی پێویستیان ناوە. 

نووسینگەی رۆژنامەڤانیی پۆلیسی فیدراڵیی ئەڵمانیا باسی لەوە کرد، پەرلەمانی ئەڵمانیا لە شوباتی 2024ـەوە سزای تووندی بۆ قاچاخچێتی بیانییەکان پەسند کردووە.

لە وەڵامی پرسیارێکدا سەبارەت بە هاوئاهەنگییان لەسەر ئاستی ئەورووپا و لەگەڵ بەریتانیا بە مەبەستی رێگەگرتن لە پەڕینەوەی کۆچبەران، لەوانەش لە رێگەی نۆکەندی ئینگیزەوە، ماول گوتی: "بۆ بەرەنگاربوونەوەی تاوانەکانی قاچاخچێتی، پۆلیسی فیدراڵی لە نزیکەوە لەگەڵ هاوبەشە نیشتمانی و نێودەوڵەتییەکان کاردەکات."

کریستن ماول ئاماژەی بەوەشکرد، هاوئاهەنگی و هاوکارییەکە چەندین بوار و وڵات لەخۆدەگرێ، لەوانەش فەرەنسا، بەلجیکا، هۆڵەندا و بەریتانیا.

ئەو بەرپرسە هەروەها رایگەیاند، لە چوارچێوەی ئەو هاوکارییەدا زانیارییەکان بەخێرایی بەش دەکەن و ئەگەریش پێویست بکات، لێکۆڵینەوەی هاوبەش دەکەن.

لە تشرینی یەکەمی 2024دا میدیای بەریتانی بڵاویکردەوە، بەشی زۆری ئەو بەلەمە بچووکانەی لە نۆکەندی ئینگلیز بە مەبەستی گواستنەوەی کۆچبەران بۆ بەریتانیا بەکاردەهێندرێن، لە چین دروست دەکرێن، بەڵام قاچاخچییەکان لە ئەڵمانیا کۆگایان هەیە و دەیانشارنەوە. 

دوای ئەوە، حکومەتەکانی ئەڵمانیا و بەریتانیا رێککەوتنێکیان بۆ بەرەنگاربوونەوەی کۆچبەرانی نایاسایی لە تەممووزی 2025 راگەیاند. بەپێی ئەو رێککەوتنە، بەرلین بەڵێنی دا یاساکانی سزادان بۆ بازرگانیکردن بە مرۆڤەوە تووند بکات.