رووداو دیجیتاڵ
بەریتانیا دەیەوێ کۆچبەری زۆرتر دیپۆرت بکاتەوە و یەکێک لەو شوێنانەش باشووری کوردستان و عێراقە.
هۆیەکەشی ئەوەیە کە تاوەکو ئێستا حکومەتی ئەو وڵاتە 6 ملیار و 400 ملیۆن پاوەندی زیاتر لەو بودجە ساڵانەیەی بۆ کۆچبەر دانراوە خەرجکردووە و دەیانەوێ سنوورێک بۆ ئەو خەرجییانە دابنێن.
حکومەتی ئێستای بەریتانیا دەیەوێ لەگەڵ حکومەتەکانی دیکە و دامەزراوە نێودەوڵەتییەکان رێكکەوتن بکات بۆ گەڕاندنەوەی ئەو کۆچبەرانەی مافی مانەوەیان نییە لەو وڵاتە. ئەویش لە رێگەی پرۆژەیەکەوە کە 15 ملیۆن پاوەندی بۆ تەرخانکراوە.
جگە لە عێراق، پاکستان و ڤێتنام و نایجیریا و 7 وڵاتی دیکەش دەتوانن بەشداری لە پرۆژەکەدا بکەن.
لە ناوەوەی بەریتانیا رەخنە لە حکومەت دەگیرێت کە عێراقیش خراوەتە ئەو لیستەوە، چونکە دەڵێن هەندێک لەو کۆچبەرانەی دەنێردرێنەوە بەڵگەنامەی تەواوەتیی عێراقییان نییە و رەنگە لە خاڵەکانی پشکنینی عێراقیدا ژیانیان بکەوێتە مەترسی.