وێنەی دەستگیرکراوەکان
رووداو-هەولێر
بەشی راگەیاندن و پەیوەندییەكانی ئاسایشی پارێزگای سلێمانی، دەستگیركردنی گرووپێكی 18 کەسی راگەیاند کە "قەرزیان بەشەراكەت وەرگرتووەتەوە و هەر شتێكی بەنرخیشیان بەرچاو كەوتبێت، دزیویانە".
بەپێی راگەیەندراوێكی بەشی راگەیاندن و پەیوەندییەكانی ئاسایشی پارێزگای سلێمانی كە ئەمڕۆ دووشەممە 24-12-2018 بڵاوكراوەتەوە، ئەو گرووپە لە 18 کەس پێكهاتوون و چەندین جۆر كاری دزییان ئەنجامداوە.
لە بەشێكی راگەیێندراوەكەدا هاتووە: "بەشێك لەوانە لەڕێگەی هەڕەشە و هێزی چەكەوە قەرزیان بۆ خاوەنەكەی وەرگرتووەتەوە و لەبەرامبەردا بڕێك پارەیان وەرگرتووە".
هەر لە راگەیەندراوەكەی بەشی راگەیاندن و پەیوەندییەكانی ئاسایشی پارێزگای سلێمانی ئەوەش خراوەتەڕوو کە ئەو كەسانە هەر شتێكی بەنرخیان دەستكەوتبێت دزیویانە، وەك "كێبڵی كارەبای پرۆژەكان و هێماكانی هاتووچۆ و سەری مەنهۆڵی شەقام و گەڕەكەكان".
ئەو 18 کەسە كە لە 18 تاوەكو 23ی ئەم مانگە دەستگیركراون، تەمەنیان لە نێوان 18 ساڵ تاوەکو 26ساڵدایە و سەرجەمیان خەڵكی شاری سلێمانی و دەورووبەرین.
پێداچوونەوە؛ عومەر شایان
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ