Hewlêr (Rûdaw) - Berî niha bi navê Sirweyekî Germ Zuhdî Dawidî belgefîlmeke Rûdawê ji nivîsîn û derhênana Sîrwan Rehîm li ser televizyona Rûdawê, Rûdaw Dijîtal û Rûdaw Streamê hat weşandin.
Niha jî li ser heman mijarê û li ser heman romannivîs û zanistî, pirtûkek ji aliyê Tora Medyayî ya Rûdawê ve hat belavkirin.
Pirtûk dê van rojan li pirtûkfiroşên Kurdistanê peyda bibe.
Pirtûk ji aliyê Sîrwan Rehîm û Newzad Ehmed Eswed ve hatiye amadekirin.
Amadekarên pirtûkê di pêşgotinê de nivîsandine:
“Zuhdî Dawidî navekî girîng e. Di cîhana roman û çîrokê de girîng e lê Zuhdî bêhtir li nik xwîner û rexnevanên Ereb tê naskirin. Sedem jî ew e ku berhem û nivîsên vî nivîskarî bi zimanê Erebî ne.
Dawidî nivîskarê bi dehan pirtûkên roman, çîrok û lêkolînan e. Her wisa nirxandinên wî li ser ramana çepgir û mijarên dîrokî hene.
Hêjayî gotinê ye ku Dawidî wergêrê karên xwe bû jî ji zimanê Almanî ji bo zimanê Erebî û herwiha bi berovajî jî.”
Zuhdî Dawidî (1940-2017) xwediyê bawernameya doktorayê di felsefeya dîrokê de bû.
Bi salan wekî zanist û mamosteyê zanîngehê li bajarên Mûsil, Kerkûk, Terablûsa Lîbyayê her wisa li bajarê Leipzigê yê Almanyayê kar kiriye.
Bi temaşekirina belgefîlma Sirweyekî Germ û xwendina pirtûkê ji xwîner re zelal dibe ku ev nivîskar “Ji bilî ku nivîskarekî taybet bû, di heman demê de kesekî sade û dostanî bû. Dostaniya bi hilm û bêhna kulîlk û giyayên deşta Germiyanê re” wekî ku amadekarên pirtûkê dibêjin.
Ev berhem bîranîna nivîskarekî şênber dike ku kurê navçeya Dawê û Çemê Ava Spî bû.
Pênûseke Kerkûkî bû ku nivîsên wî çi roman çi li ser dîroka Kurdistanê bi berdewamî çavkaniya germahiyê bûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse