Şaşiyek çêbû. Tika ye paşê dîsa hewl bide.
Derhêner Ekrem Heydo / Wêne: Ji ber dîmenan, Rûdaw
New York (Rûdaw) - Festîvala 9emîn a Fîlmên Kurdî ya New Yorkê bi beşdariya hejmareke berbiçav a fîlman ji çar parçeyên Kurdistanê û cîhanê dest pê kir.
Festîvala 9emîn a Fîlmên Kurdî ya New Yorkê girîngiyeke taybet dide nasandina berhemên derhênerên Kurd.
Rêkxerên festîvalê tekezî li ser wê yekê dikin ku armanca wan a sereke ew e ku platformekê ji bo sînemakarên Kurd biafirînin da ku ew karibin çîrok, xewn û êşên xwe bi zimanê hunerê bigihînin temaşevanên Amerîkî û biyanî.
Nûçegihanê Rûdawê yê Amerîkayê Namo Ebdulla di hevpeyvîneke kurt de li gel Ekrem Heydoyê derhênerê ji Rojavayê Kurdistanê û juriyê festîvalê behsa girîngiya festîvalê kir.
Derhêner Ekrem Heydo li ser festîvalê got:
"Ev festîval ji bo temaşevanên Kurd ên li diyasporayê û ji bo temaşevanên biyanî jî platformeke gelekî baş e.
Roja yekem gelek kes hatin û beşdar bûn."
Ekrem Heydoyê ku di warê sînemayê de xwedî tecrubeyek dewlemend e, daxwaza xwe ya ji bo veguhastina vê tecrubeya navneteweyî ber bi Rojavayê Kurdistanê ve anî ziman:
"Rast e li Rojavayê festîvalên me hene lê em dixwazin di paşerojê de vê tecrubeya xwe ya Amerîkayê bibin û festîvaleke bi heman rengî û bi heman standardan li dar bixin."
Heydo derbarê peyama sînemaya Kurdî tekezî li ser wê yekê kir ku ji bo nîşandana hebûna xwe hunera heftem bûye zimanê gerdûnî yê Kurdan û got:
"Bi rêya fîlman, Kurd dikarin ji cîhanê re bibêjin, em hene, em dikarin berheman çêbikin, werin li kar û jiyana me temaşe bikin.
Ev ji bo nasandina çanda me derfeteke zêrîn e."
Festîvala 9emîn a Fîlmên Kurdî ya li bajarê New Yorka Amerîkayê 20ê Îlonê dest pê kir û dê heta 25ê mehê deriyên xwe vekirî bihêle.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse