Hewlêr (Rûdaw) - Li 25 bajar û navçeyên Bakurê Kurdistanê bi hezaran kes ji bo şermezarkirina êrişên li ser taxên Kurdan ên Şêx Meqsûd û Eşrefiyeyê rabûn ser pêyan.
Çalakiyên berfireh bi pêşengiya DEM Partiyê, DBPyê û Platforma Saziyên Demokratîk li sê navendên sereke; Amed, Wan û Êlihê hatin lidarxistin.
Hevserokê Giştî yê Partiya Herêmên Demokratîk (DBP) Keskîn Bayindir li Amedê beşdarî meşê bû û peyameke tund da Enqere û Şamê.
Bayindir diyar kir ku dilê gelê Kurd li Rojavayê Kurdistanê ye û got:
“Vê peyamê bibihîzin; Rojava bîbika çavê gelê Kurd û Kurdistanê ye. Êrişa li ser Şêx Meqsûd û Eşrefiyeyê û êrişa li ser Amedê ye; êrişa li ser Hewlêr, Silêmanî û Mehabadê ye.
Hesabê şaş çawa ji Kobaniyê vegeriya, dê ji Helebê jî vegere. Kurd dê li ber xwe bidin û têbikoşin.”
Li Cizîrê alozî derketin
Di xwenîşandanên li navçeya Cizîra Şirnexê de alozî derketin. Polîsê Tirkiyeyê êrişî xwenîşanderan kir û nehişt ku rojnameger dîmenan tomar bikin.
Di encama midaxaleyê de hejmarek kes hatin desteserkirin.
Li Êlihê jî welatiyan bi yekdengî êriş şermezar kirin û diyar kir ku "Rojava dê ji bo çeteyan bibe goristan."
Peyama zelal a ji ber Parlamentoya Tirkiyeyê
Parlamenterên DEM Partiyê li nav cergê Parlamentoya Tirkiyeyê bi pankartan nerazîbûna xwe nîşan da û piştre li ber avahiya parlamentoyê daxuyaniyek da.
Alîkara Wekîla Serok a Koma DEM Partiyê Gulîstan Kiliç Koçyîgîtê destnîşan kir ku her guleyeke li Helebê tê teqandin li dijî wan e û got, “Eger Tirkiye bi rastî dixwaze li Sûriyeyê tiştekî avaker bike, divê bi lez pêşiyê li van rûbirûbûnan bigire.”
Ji 6ê vê mehê ve taxên Şêx Meqsûd û Eşrefiyeyê bi çekên giran tên bombebarankirin û amarên kuştî û birîndaran her ku diçe zêde dibin.
Platforma Saziyên Demokratîk ragihand ku heta êrişên li ser Kurdên Helebê bidomin, dê çalakiyên wan jî bidomin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse