Hewlêr (Rûdaw) - Karwanekî leşkerî yê Amerîkayê yê li Rojavayê Kurdistanê îro derbasî Herêma Kurdistanê bû.
Karwanê leşkerî yê mezin ê ku leşkerên Amerîkayê yên erkê wan li Rojavayê Kurdistanê qediyaye vediguhêze, di rêya Dihokê re derbas bû û gihişt parêzgeha Hewlêrê.
Di karwanê de gelek barhilgirên ku wesayîtên zirxî, Humvee û cebilxaneya leşkerî vediguhêzin cih digirin.
Guhertina hêzan a rûtîn
Berpirsekî bilind ê Parêzgariya Hewlêrê derbarê mijarê ji Rûdawê re ragihand ku ev tevger ne vekişîn e, guherîneke rûtîn e.
Wî rayedarî got, "Yekîneyên ku dema erkê wan a li Rojavayê Kurdistanê qediyaye, di çarçoveya guhertinê de di rêya Herêma Kurdistanê re vedigerin."
Hebûna Amerîkayê ya li Rojavayê Kurdistanê
Amerîkayê salên 2014 û 2015an bi destpêkirina şerê DAIŞê û zêdebûna metirsiya li ser Kobaniyê, hêz û kel û pelên leşkerî şandibûn herêmê.
Niha nêzîkî 900 leşkerên Amerîkayê li deverên cuda yên Rojavayê Kurdistanê bi cih bûne.
Ev yekîne û kel û pelên leşkerî di çarçoveya pêdiviyên ewlehiyê û planên operasyonel de dem bi dem tên guhertin.
Hat diyarkirin ku karwanê ku îro gihiştiye Hewlêrê jî beşek ji vê pêvajoya guhertinê ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse