Serhat Eren / Wêne û Vîdeo: Rûdaw
Hewlêr (Rûdaw) - Parlamenterê Partiya Gelan a Wekhevî û Demokrasiyê (DEM Partî) yê Amedê Serhat Eren ragihand ku endezyar û mîmarê sereke yê pêvajoya çareseriyê Abdullah Ocalan e û got, "Pêvajoya çareseriyê bêyî Ocalan naçe serî."
Li Tirkiye û Bakurê Kurdistanê pêvajo berdewam dike û mijareke germ ew e ku Komîsyon here Îmraliyê yan neçe.
Parlamenterê DEM Partiyê yê Amedê Serhat Eren pêvajo ji Nûçegihanê Rûdawê Maşallah Dekak re nirxand.
Serhat Eren diyar kir ku aktorê herî mezin ê vê pêvajoyê Abdullah Ocalan e û û tevgerê (PKK) piştgirî daye banga wî.
Eren ji bo serkeftina pêvajoyê bal kişand ser girîngiya hevdîtinên rasterast û da zanîn ku divê komîsyona parlamentoyê bi Abdullah Ocalan re hevdîtinan pêk bîne.
Mînakên li cîhanê
Parlamenterê DEM Partiyê mînakên çareserkirina pirsgirêkan ên li cîhanê dan û got:
"Li seranserê cîhanê, di gelek pevçûn, şer û pirsgirêkên civakî de, ji bo çareseriyê mixatab ew kes in ku dest bi şer kiriye.
Wek mînak li Kolombiyayê Fermandarê FARCê Timochenko, li Başûrê Afrîkayê Mandela, li Nepalê Prachanda û di pirsgirêkên ETA û IRAyê de jî fermandarên wan wekî mixatab hatin qebûlkirin."
Serhat Eren bal kişand ser wê yekê ku kesê ku dest bi şer kiriye û di nava civakê de xwedî meşrûiyet e, divê ji bo çareseriyê bibe mixatab û got, ji bo ku pêvajo bigihîje encamê divê yasayên pêwîst bên derxistin û Komîsyon bi Ocalan re bicive.
Eren amaje bi wê yekê kir ku Ocalan herî baş dizane ku wî çima dest bi vî şerî kiriye, çima dixwaze bi dawî bîne û ji bo ku pêvajo derbasî qonaxeke siyasî û hiqûqî bibe çi pêwîst e.
Parlamenterê DEM Partiyê herî dawî got, ew dixwazin di dema herî zû de û berî amadekirina rapora Komîsyonê, heyetek here Îmraliyê û got:
“Ew (Ocalan) bi biryar e ku ev mesele çareser bibe. Komîsyonê guh da her kesî lê heta niha guh nedaye aktorê sereke.
Ev yek pêwîstiyek e, bêyî vê yekê ev mesele çareser nabe.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse