Li Merîwanê agir bi daristanê ket

Hewlêr (Rûdaw) - Agir bi daristanên bajarê Merîwanê yê Rojhilatê Kurdistanê ket.

Çavkaniyeke ku nexwest navê wê were eşkerekirin ji Rûdawê re da zanîn ku agir doh piştî nîvro li devera "Gomarleş" û "Kolît"ê ya Merîwanê bi daristanê ketiye û şewatê beşeke daristanê û mêrgê daye ber xwe.

Li gorî agahiyên ku heman çavkaniyê dane, tîmên agirvemirandinê ji bo vemirandina agir neçûne û şewat bi hewla xwebexşan, jîngehparêzan û xelkê deverê hatiye kontrolkirin.

Her wiha bi dehan darên daristanê şewitîne ku temenê wan zêdetirî 100 salî ye.

Heman çavkaniyê destnîşan kir ku zêdetirî 40 donim daristan şewitiye û sedema agir jî ne diyar e û bi dehan ajelên kovî şewitîne yan jî birîndar bûne.

Bajarê Merîwanê 78 kîlometreyan ji navenda parêzgeha Sineyê dûr e. Parêzgeheha Sineyê xwedî 185 hezar hektar daristan e.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger