Parlamentera HDPê Feleknas Uca
Semsûr (Rûdaw) - Parlamentera HDP’ê ya Êlihê Feleknas Uca, diyar kir ku li Adiyemanê wêraniyeke mezin pêk hatiye û got, “Dewletê hê tiştek nekiriye. Şaredarî ya AK Partiyê ye lê AK Partî ne li vir e."
6ê Sibatê roja Duşemê saet 04.17ê danê sibê saet di 13.24an de 2 erdhejên mezin bi hêza 7.7 û 7.6 ku navendên wan navçeyên Bazarcix û Elbistan ên Mereşê bûn; 10 parêzgehên Bakurê Kurdistanê û Tirkiyê hejandin. Erdhej li parêzgehên Mereş, Kilîs, Amed, Edene, Osmaniye, Dîlok, Riha, Semsûr, Meletî û Hatayê bûye sedema wêraniyeke mezin.
Ji ber erdhejê heta niha nêzî 30 hezar kesan jiyana xwe ji dest dane û bi hezaran kes jî birîndar bûne. 147 hezar û 934 kesên ku ji karesatê rizgar bûne ji parêzgehên ku ji ber erdhejê bandor bûne, bo cihên ewle hatin veguhastin
Parlamentera HDP'ê ya Êlihê Feleknas Uca ku îro bi hejmarek parlamenterên HDPê re serdana Semsûrê kiribû, ji Rûdawê re têkildarî rewşa Semsûrê piştî erdhejê axivî.
Feleknas Uca got: “Weke hûn jî dizanin li Kurdistanê karesateke mezin çê bûye. Ji kêliya yekem a erdhejê ve me weke HDP’ê wekîl û heyetên xwe şandin 11 parêzgehan. Hevserokên me çûn serdana herêmên erdhejê. Felaketa herî mezin jî ew e ku bi hezaran welatiyên me hîn di bin xirbeyan de ne. Ev kes nehatin derxistin û niha jî bi kepçeyan dixwazin kavilan rakirin. Dema kepçe bê aktîvkirin dê giyan û cesedên di hundir de bên parçekirin.”
Parlamentera HDPê rexne li çêkirina avahiyên bê standard li Semsûrê girt û diyar kir, li Semsûrê avahiyên ku li hember erdhejê bisekinin nehatine çêkirin.
Feleknas Uca got: “Binêrin hemû herêm wêran bûye. Avahiyên rawestayî tune ne. An tê hilweşandin an jî pêdivî ye ku were hilweşandin. Piştî erdhejan hê jî dewam dikin. Dewlet tunebû. Niha, gava ku hûn dipirsin, kes nabêje ku ew piştî roja 3-an hatine. Gel bi derfetên xwe makîneyên kar anîn. Welatiyên çûn ber xirbeyan û kesên sax bûn an jî jiyana xwe ji dest dan bi derfetên xwe derxistin. Hikûmetê heta niha tiştek nekiriye. Şaredarî ya AK Partiyê ye, lê AK Partî ne li vir e.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse