Hewlêr (Rûdaw) - Birêvebirê nahyeya Mela Qereyê ya li Mexmûrê Azad Cewher diyar kir ku di encama êrişeke bi dronan a li ser sînorê Eniya 6 a Hêzên Pêşmergeyan de 4 kes birîndar bûne.
Droneke din jî li nêzîkî nahyeya Dîbegeyê ketiye xwarê.
Azad Cewher ji Rûdawê re got, "Demjimêr 22:30an bi du dronan êrişî sînorê Eniya 6 a Pêşmergeyan hat kirin û di encamê de 4 kes birîndar bûn."
Di heman demê de, Fermandarê Hêza Xwebexş a li sînorê Çiyayê Qereçoxê, Xazî Feysel ji Rûdawê re got: "3 dron li ser asmanê navçeya Mexmûr û Çiyayê Qereçoxê re derbas bûn."
Fermandarê Hêza Xwebexş a sînorê Çiyayê Qereçoxê amaje bi wê yekê kir ku yek ji wan dronan li navbera gundên Eala û Xoşaw ên nêzîkî nahyeya Dîbegeyê ketiye xwarê.
Ev êriş di demekê de ye ku li gorî amarên heyî, ji 28ê Sibatê ve ku şerê Amerîka û Îsraîlê li dijî Îranê dest pê kiriye, Herêma Kurdistanê bi 277 dron û mûşekan hatiye bombebarankirin.
Di encama van êrişan de 5 kesan canê xwe ji dest daye û 24 kes jî birîndar bûne ku di nav wan de zarok jî hene.
Êriş û bombebaran heta îro bi vî rengî bûn:
Hewlêr: 233 êrişên bi dron û mûşekan li ser Hewlêrê navçeyên wê hatine kirin.
Silêmanî: 41 êriş li ser bajarê Silêmaniyê û navçeyên wê hatine kirin.
Dihok: Di rojên borî de 3 êriş bi çar dronan li ser parêzgeha Dihokê hatine kirin.
Helebçe: Herî kêm êriş li Helebçeyê pêk hatine, tenê di 7ê Adarê de bi du dronan êrişî Çiyayê Şinroyê yê parêzgehê hatiye kirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse