Werzişvan hildikişin ser Çiyayê Sîpanê / Wêne: Ji ber dîmenan, Vadî-Doga
Hewlêr (Rûdaw) - Tîmeke çiyageran a Komeleya Werzişê ya Vadî-Dogayê li navçeya Xelatê ya Bedlîsê derket lûtkeya Çiyayê Sîpanê.
Çiyager û werzişvanan vê hefteyê dîsa berê xwe da rêyeke dijwar û zehmet a ber bi lûtkeya Çiyayê Sîpanê ve ku wekî warê Siyabend û Xecê tê naskirin.
Serokê Komeleya Vadî-Dogayê Omer Demez dîmenên geşta xwe ji Rûdawê re şandin û banga parastina jîngehê kir.
Serokê Komeleya Vadî-Dogayê Omer Demez got:
“Îro meş û çiyageriya me li Çiyayê Sîpanê Xelatê bû.
Em 26 kes derketin vê rêyê û bi rastî gelekî zehmet bû lê gelekî xweş bû.
Hevalên me hemû derketin serê çiyê. Me zehmetiya wê dît lê dîtina serê çiyê xweştir bû.
Çiya û xwezayê biparêzin.”
Li lûtkeya Çiyayê Sîpanê cemedên bi hezar salan hene ku ti carî nahelin.
“Di bin axê de dimîne”
Demez li ser wan cemedan jî wiha axivî:
“Ev der Şikefta Cemedê ya Çiyayê Sîpanê ye.
Ev cemedên binê erdê ne û gelek dîrokî û kevnar in.
Dîroka wan digihêje çend hezar salan.
Baran û berfa ku dibare axê bi xwe re tîne û ew ax serê cemedê digire.
Berfa ku nû dibare dihele lê ya di bin axê de dimîne.”
Çiyager û werzişvan bi dîtina lûtkeya Çiyayê Sîpanê kêfxweş bûn û li lûtkeyê bi şevê dîmenên bajarên derdorê temaşe kirin.
Çiyagerê bi navê Omer jî hestên xwe wiha anîn ziman:
“Ji bo ku ez hatim serê Çiyayê Sîpanê, ez pir kêfxweş bûm.
Bi rastî rêya me gelekî zor bû lê bi hevalên qenc û delal re xweş derbas bû.”
Çiyayê Sîpanê di mîtolojiya Kurdî û destana Siyabend û Xecê de xwedî cihekî taybet e û gelek stran, çîrok û helbest li ser hatine nivîsandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse