Hewlêr (Rûdaw) - 33 Sal berî niha Nodşeya Rojhilatê Kurdistanê ji aliyê hikûmeta Iraqê ve hat kîmyabarankirin û welatiyekî wî bajarî jî dibêje, kîmyabarankirina bajrê wan hatiye paşguhxistin.
Şarezayê Dîrok û xelkê Nodşe Dr. Îsmaîl Mehmûdî ji Radyoya Rûdawê re got: “Hê jî bandora wê kîmyabaranê li bajarokê Nodşe maye, salane mexdûrên wê kîmyayiyê ji ber wê yekê dimrin, vêca ji ber birîna Helebceyê kûrtir bû, bajarokê Nodşe ket aliyekî û niha em dikarin bibêjin hatiye paşguhxistin.”
Roja 17ê Adara 1988an piştî kîmyabarankirina Helebceyê, bajarokê Nodşe ser bi parêzgeha Kirmaşan a Rojhilatê Kurdistanê bi gaza Xerdel hat kîmyabarankirin. Dr. Îsmaîl Mehmûdî dibêje: “Mixabin gelekî dereng behsa karesata kîmyabarana Nodşe hat kirin û ti amarên tam û hûr li ber dest nînin. Divabû birîndarên wê karesatê bi başî bihatana qerebûkirin. Nêzîka 700 kes birîndar bûn.” Mehmûdî dibêje, niha jî rewşa tendirûstî ya wan birîndaran nebaş e û hevdem bandora kîmyabaranê bi bajêr ve diyar e.
Bajarokê Nodşe li navçeya Hewraman a Rojhilatê Kurdistanê ye, roja 17ê Adara 1988an ji aliyê firokeyên rejîma Baasê ya Iraqê ve demjimêr 10:11 deqe hat kîmyabarankirin. Bi heft bombeyên kîmyayî ya gaza Xerdel nav bajarê Nodşe hat armanckirin û li gor amarên fermi yên hikûmeta Îranê, 13 kesan canê xwe ji dest dan û zêdeyî 100 kes jî wek berketiyên kîmyayî hatin tomarkirin, lê xelkê Nodşe dibêjin, hejmara berketiyan gelekî zêdetir e û ji wê demê ve çendîn kesên din jî ji ber kîmyabaranê cane xwe ji dest dane, lê nave wan wek qurbanî nehatiye tomarkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse