Hewlêr (Rûdaw) - Partiya Sosyalîst a Kurdistanê (PSK) di salvegera Peymana Lozanê de got, “Peymana Lozanê, destpêka pêvajoya sed salî ya înkar, asîmîlasyon û qirkirina gelê Kurd e.”
Partiya Sosyalîst a Kurdistanê (PSK) di 102emîn salvegera Peymana Lozanê de daxuyaniyek belav kir.
PSKyê ragihand ku bi wê peymanê Kurdistan bûye çar parçe.
Daxuyaniya PSKyê wiha ye:
“Di ser îmzekirina Peymana Lozanê ya 24ê Tîrmeha 1923yan re 102 sal derbas bûn.
Peymana Lozanê, destpêka pêvajoya sed salî ya înkar, asîmîlasyon û qirkirina gelê Kurd e.
Di encama Peymana Lozanê de ku Kurd tê de nehatin temsîlkirin, Kurdistan ji aliyê hêzên emperyalîst û dewletên dagirker ve li ser çar parçeyan hat dabeşkirin.
Peymana Lozanê ji bo gelê me navê din ê tarîtî, zilm, komkujî û asîmîlasyonê ye.
Em Peymana Lozanê ya ku îradeya gelê me bin pê dike û statuya koletiyê bi ser gelê Kurd de ferz dike, careke din red dikin û kesên ku ev peyman îmze kiriye û bi cih aniye bi tundî şermezar dikin.
Gelê me dê têkoşîna xwe ya bi biryar a azadî û rizgariya neteweyî berdewam bike û Peymana Lozanê dê zû yan jî dereng bikeve zibildanka dîrokê.”
Peymana Lozanê 24ê Tîrmeha 1923yan li bajarê Lozanê yê Swîsreyê hatibû îmzekirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse