Hewlêr (Rûdaw) - Hêzên Deryayî yên Artêşa Pasdaran a Îranê ragihand ku di 24 demjimêrên dawî de 25 keştî di Tengava Hurmizê re derbas bûne.
Ev derbasbûn bi erêkirin û hevahengiya Tehranê pêk hatiye.
Piştî aloziya di navbera Amerîka, Îsraîl û Îranê de, tevgera bazirganiyê ya li tengavê bi baldarî tê şopandin.
Televîzyona dewletê ya Îranê IRIBê agahî li ser rewşa dawî ya Tengava Hurmizê dan.
Ev tengav yek ji korîdorên herî girîng ên enerjiyê ya cîhanê ye.
Di daxuyaniyê de hat diyarkirin ku 25 keştiyên bazirganiyê ew rêya avê ya stratejîk bi kar aniye.
Di nava van keştiyan de tankerên petrolê û keştiyên konteyniran jî hene.
Hat gotin ku ev derbasbûn "di çarçoveya kontrol, ewlehî û destûra Hêzên Deryayî yên Artêşa Pasdaran de" pêk hatiye.
Aloziya herêmî û pêvajoya agirbestê
Krîza ku dawiya meha sibatê bi êrişên Amerîka û Îsraîlê yên li dijî Îranê dest pê kiribû gelekî mezin bûbû.
Tehranê ji bo tolhildanê êrişî Îsraîl û hevpeymanên Amerîkayê yên li Kendavê kiribû.
Di vê pêvajoyê de Îranê Tengava Hurmizê girtibû.
Vê yekê di bazarên enerjiya cîhanî de tirs û xofeke mezin çêkiribû.
8ê Nîsanê bi navbeynkariya Pakistanê agirbesteke demkî hatibû ragihandin.
Lê belê ji dan û standinên dîplomatîk ên li Îslamabadê hîn peymaneke aştiyê ya mayînde derneketiye.
Biryara Trump a ji bo domandina dorpêçê
Li gorî çavkaniyên dîplomatîk, Serokê Amerîkayê Donald Trump biryar daye ku pêvajoya agirbestê bêdem dirêj bike.
Lê wî dorpêça deryayî ya li ser benderên Îranê ranekiriye.
Astengiyên li ser wan keştiyên ku bi rêya Tengava Hurmizê diçin Îranê yan jî ji wir derdikevin didomin.
Ji bo ku li herêmê şer û pevçûn ji nû ve dest pê nekin, dîplomasî jî didome.
Serokerkanê Giştî yê Pakistanê ji bo hevdîtinan niha li Tehrana paytexta Îranê ye.
Dilê enerjiya cîhanî
Ev aloziya li Kendavê ji bo aboriya cîhanî rîskeke mezin derdixe holê.
Beriya pevçûnan, nêzîkî ji sedî 20ê peydakirina enerjiya cîhanê di Tengava Hurmizê re pêk dihat.
Her çend hewldanên dîplomatîk bidomin jî astengiyên di veguhastina deryayî de dilgiraniyên li bazarên enerjiyê zindî dihêlin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse