Hewlêr (Rûdaw) - Li gorî amarên Birêvebiriya Giştî ya Girtîgehan a Tirkiyeyê, li girtîgehên Tirkiye û Bakurê Kurdistanê bi giştî 403 hezar û 60 girtî hene.
Ev hejmar 103 hezar û 179 kes ji kapasîteya girtîgehan zêdetir e.
Birêvebiriya Giştî ya Girtîgehan a Tirkiyeyê amarên dawî yên girtiyên ku li girtîgehan dimînin eşkere kirin.
Li gorî amaran di tevahiya girtîgehên li Tirkiye û Bakurê Kurdistanê de bi giştî 403 hezar û 60 girtî dimînin.
Amar di demekê de ye ku li gorî zanyariyên malpera fermî ya Wezareta Dadê ya Tirkiyeyê kapasîteya 395 girtîgehên li Tirkiye û Bakurê Kurdistanê bi giştî 299 hezar û 881 kes in.
Wate ew girtîgeh tenê dikarin ew qas kesan li xwe bigirin lê li gorî amarên dawî 103 hezar û 179 kesên girtî ji kapasîteya heyî di girtîgehan de dimînin.
Li gorî amaran li girtîgehên Tirkiye û Bakurê Kurdistanê 2yê Kanûna Paşîna 2024an 292 hezar û 282 kes, 3yê Hezîrana 2024an 337 hezar û 760 kes, 1ê Çiriya Paşîna 2024an 371 hezar û 587 kes, 2yê Kanûna Pêşîna 2024an 378 hezar û 657 kes, 3yê Sibata 2025an 392 hezar û 456 û 3yê Adara 2025an jî 398 hezar û 694 kes diman.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse