Hewlêr (Rûdaw) - Tîma futbolê ya Amedsporê bi peyamekê pîrozbahî li alîgirên tîma futbolê ya Zaxoyê kirin ku Xelata "Alîgirên Herî Baş" a FIFAyê standiye.
Amedsporê li ser hesabê xwe yê fermî yê Xê bi Kurdî (Kurmancî, Kirmanckî) û Tirkî peyamek belav kir.
Amedsporê di peyama xwe ya bi Kurmancî de anî ziman:
"Pîroz be Zaxo!
Em ji bo wergirtina xelata bi prestîj a "Xelata Alîgirên FIFA”yê pîrozbahiyê li alîgirên Zaxosporê dikin ku ji aliyê Federasyona Navneteweyî ya Futbolê (FIFA) ve hêjayî vê xelatê bûne.
Hest û yekîtiya ku we li trîbûnan nîşan dayî û wateya ku we li nirxên gerdûnî yên futbolê zêdekirî bi her awayî hêjayî xelatê ne.
Wekî civaka Amedsporê, em vê destkeftiya watedar pîroz dikin."
Amedsporê di peyama xwe ya bi Kirmanckî de jî da zanîn:
“Pîroz bo Zaxo!
Ma zerrî ra terefdaranê Zaxosporî pîroz kenê ke hetê Yewîya Federasyonanê Futbolî ya Mîyanneteweyî (FIFA) ra layîqê xelata prestîjîne ya “Xelata Terefdaran ya FIFAyî” ameyê vînayîş.
Coş, yewîye û manaya ke şima trîbunan de mojna zaf ercayî bi. Û şima taximê xo vist mîyanê ercanê unîversalî yê futbolî. Aye ra şima heta peynî na xelate heq kenê.
Ma sey keyeyê Amedsporî, nê serkewtişê şima bi zerrî ra pîroz kenê.”
Alîgirên Zaxoyê bûn yekemînên cîhanê
Federasyona Navneteweyî ya Futbolê (FIFA), îro bi awayekî fermî ragihand ku alîgirên tîma Zaxoyê di dengdana cîhanî de bi ser ketine.
FIFAyê ji ber piştgiriya wan a ji bo zarokên ku bi penceşêrê ketine alîgirên tîma Zaxoyê hêjayî Xelata "Alîgirê Herî Baş" a sala 2025an dîtin.
Alîgirên tîma Zaxoyê, di maça Lîga Stêrkan a Îraqê ya li hemberî El Hudûdê de ku 13ê Gulana 2025an hatibû lîstin, bi hezaran pêlîstok avêtibûn qadê.
Vê çalakiya mirovî bala hemû cîhanê kişandibû.
Di dengdana fermî de, alîgirên Zaxoyê ketin pêşiya hevrikên xwe yên bihêz ên wekî Arjantîn û Spanyayê.
Bi vî awayî bûn yekemîn alîgirên li Rojhilata Navîn ku vê xelata bi prestîj werdigirin.
"Em xelatê diyarî çar parçeyên Kurdistanê dikin"
Serokê Tîma Werzişê ya Zaxoyê Omer Ferhad piştî eşkerekirina xelatê yekser ji Rûdawê re axivî û kêfxweşiya xwe anî zimên.
Omer Ferhad ev serkeftina dîrokî diyarî "yekîtiya çar parçeyên Kurdistanê" kir.
Wî diyar kir ku ew bi FIFAyê re di nav pêwendiyê de bûn lê encam ji bo wan jî bûye surprîz û got:
"Ev hest nayê pênasekirin. Me berê bi FIFAyê re hevdîtin kiribû û em li ser pêvajoyê axivîbûn, wan hinek agahî ji me wergirtibûn.
Lê me niha bi daxuyaniyê re fêhm kir ku em bi ser ketine."
Omer Ferhad destnîşan kir ku ev serkeftina cîhanî ne tenê ya tîmeke werzişê ye, ew nîşana yekîtiyeke berfirehtir e.
Omer Ferhad serkeftin diyarî "yekîtiya çar parçeyên Kurdistanê" kir û spasiya her kesî kir ku di pêvajoya dengdanê de piştgirî daye alîgirên tîma Zaxoyê û dengê xwe dane wan.
Ahengeke mezin tê lidarxistin
Tîma Zaxoyê amadehiyên mezin kirine û deriyên stadyumê ji bo hemû xelkê Kurdistanê vekirî ne.
Li gorî bernameyê, dê li ser ekranên mezin merasîma FIFAyê bê temaşekirin û hunermendê navdar Ebdulqehar Zaxoyî dê konserekê li dar bixe.
Hat ragihandin ku dê dîmenên bêhempa yên fîşekên hewayî hebin.
Endamê Desteya Kargêriyê ya Tîma Zaxoyê Diljar Endan bangî xelkê kir ku çi li stadyumê û çi li malên xwe bi hev re fîşekên hewayî biteqînin da ku dîmenekî xweşik pêşkêşî cîhanê bikin.
Serok û serkirde û rayedarên Başûrê Kurdistanê jî bi peyaman alîgirên tîma futbolê ya Zaxoyê pîroz kirin.
Pîroz be Zaxo!
— Amedspor (@amedskofficial) December 16, 2025
Em ji bo wergirtina xelata bi prestîj a "Xelata Alîgirên FIFA”yê pîrozbahiyê li alîgirên Zaxosporê dikin ku ji aliyê Federasyona Navneteweyî ya Futbolê (FIFA) ve hêjayî vê xelatê bûne.
Hest û yekîtiya ku we li trîbûnan nîşan dayî û wateya ku we li nirxên gerdûnî… pic.twitter.com/QPzPwwBrRY
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse