Almanya cezayên li ser sextekariya bawernameya zimên tundtir dike

Dusseldorf (Rûdaw) - Her du fraksiyonên Partiya Demokrat a Xirîstiyan (CDU) û Sosyal Demokratan (SPD) li Parlamentoya Federal a Almanyayê, nîvê vê heftiyê projeyasayek ji bo tundtirkirina rêkarên dayîna nasnameya Almanî bir Parlamentoyê.

Li gorî projeyasayê, ew biyaniyên ku di dema daxwazkirina pasaporta Almanî de belge û bawernameyên sexte yên fêrbûna zimanê Almanî pêşkêş bikin, dê rûbirûyî cezayên giran bibin.

Cezayê 10 salan

Kesên ku sextekariyê bikin dê heta 10 salan ji mafê daxwazkirina hevwelatîbûnê bêpar bimînin.

Bidestxistina bawernameya zimanê Almanî heta asta B1ê ku qonaxa sêyemîn a fêrbûna ziman e (piştî A1 û A2yan), yek ji şertên sereke ye ji bo wergirtina pasaportê.

Operasyonên polîsan

Ev ast ji bo hinek ji biyaniyan zehmet e û nikarin bi hêsanî bi dest bixin, lewma hinek ji wan serî li sextekariyê didin.

Di vê çarçoveyê de, Polîsê Federal ê Almanyayê ragihandibû ku dawiya Çiriya Paşîna îsal, di kampanyayekê de li bajarên Frankfurt û Stuttgartê, 15 kes bi tohmeta sextekirina bawernameya ziman desteser kirine.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger