Bi deh hezaran Pakistanî ji bo piştgiriya Imran Xan daketin kolanan

Hewlêr (Rûdaw) - Li Pakistanê bi deh hezaran alîgirên Serokwezîrê berê Îmran Xan li gelek bajarên wî welatî li dijî ji kar avêtina wî xwepêşandan saz kirin.

Piştî parlamentoya Pakistanê bawerî ji Serokwezîr Imran Xan stand, li ser banga Serokê Partiya Tevgera Edaletê ya Pakistanê (PTI) Xan, li Karaçî, Lahûr, Peşawer, Multan û gelek bajaran bi taybet li paytext Îslamabadê xwepêşandan li dijî vê biryara parlamentoyê hatin lidarxistin.

Li paytext Îslamabadê gelek kes bi wesayîtên xwe konvoyek ava kirin. Di dema ku xwepêşanderan alên Pakistan û PTI di destê wan de bûn, ji bo piştgirîkirina Imran Xan dirûşm berz kirin û bertek nîşanî partiyên hevrik ên ku bûne sedema jikardûrxistina Imran Xan dan.

Ji aliyê din ve, serokwezîrê berê û serokê PTI Imran Xan, di daxuyaniyekê de li ser twîterê spasiya Pakistaniyan kir ku bi gotina wî "hevkarên herêmî û guhertina rejîmê ya bi piştgirîya Amerîkayê" protesto kirin.

Xan destnîşan kir ku Pakistan di sala 1947an de serbixwe bû, lê têkoşîna azadiyê ya li dijî planên guhertina rejîma biyanî îro ji nû ve dest pê kir.

Duh parlamentoya Pakistanê bi 174 dengên Na bawerî ji hikûmeta Îmran Xan stend û kabîneya hikûmeta wî hilweşiya.

Li dijî biryara parlamentoyê û hilweşandina hikûmetê, bi deh hezaran Pakistanî li gelek bajarên wî welatî ji bo piştgiriya Imran Xan daketin kolanan

Zêdetir: https://t.co/Jx8WTvqcc0 pic.twitter.com/vN0N7MWULB

— RudawKurdi (@RudawKurdi) April 11, 2022

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger