Hewlêr (Rûdaw) - Berdevkê Wezareta Parastinê ya Tirkiyeyê ragihand ku hikûmeta wan ji NATOyê re projeyeke taybet a boriya sotemeniyê pêşniyar kiriye û ew proje li gorî yên din 5 qatan kêmtir mesrefê dixwaze.
Berdevkê Wezareta Parastinê ya Tirkiyeyê Zekî Akturk îro da zanîn ku wan ji bo xurtkirina ewlehiya enerjiyê ya li baskê rojhilat ê NATOyê gav avêtiye.
Akturk eşkere kir ku wan "Projeya Boriya Sotemeniyê ya NATOyê" pêşniyar kiriye.
Hûrgiliyên projeyê
Armanca projeyê ew e ku veguhastina sotemeniyê ya bi deryayê re kêm bibe.
Hat diyarkirin ku mesrefê vê projeyê li gorî alternatîvên din 5 qatan kêmtir e û dê di demeke kurttir de bikeve pratîkê.
Hikûmeta Tirkiyeyê projeyeke stratejîk ku bihayê wê 1,2 milyar dolar e pêşkêşî hevpeymaniya NATOyê kiriye.
Armanc ew e ku xeteke boriya veguhastina sotemeniya leşkerî di nav Bulgaristanê re bikişînin û bigihînin Romanyayê.
Bi vî awayî dê pêdiviyên enerjiyê yên baskê rojhilat ê hevpeymaniyê bên peydakirin.
Tê çaverêkirin ku biryara dawî ya li ser vê projeyê di lûtkeya bê ya NATOyê de bê dayîn.
Lûtkeya NATOyê dê 7 û 8ê Tîrmeha 2026an li Enqereyê were lidarxistin.
Ev xeta boriyê dê tenê ji bo leşkeriyê be û bi ti awayî ji bo veguhastina sotemeniya sivîl nayê bikaranîn.
Şerê Ukraynayê û aloziya li Tengava Hurmizê
Êrişa Rûsyayê ya li Ukraynayê û krîza enerjiyê di cîhanê de bandoreke mezin kiriye.
Her wiha, di encama êrişên Amerîka û Îsraîlê yên li dijî Îranê de Tengava Hurmizê hatiye girtin.
Vê aloziya li herêmê NATO neçar kiriye ku pergala xwe ya peydakirina sotemeniyê xurttir bike û zêdetir xwe bispêre rêyên bejahî yên aram.
Ev projeya Tirkiyeyê temamkera hewldanên Polonya û Romanyayê ye.
Ew welat hewl didin ku pergala boriyên NATOyê (NPS) ber bi rojhilat ve dirêj bikin.
Ev pergal di serdema Şerê Sar de tenê heta Almanyayê diçû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse