Hewlêr (Rûdaw) -Wezîrê Karên Derve yê Fransayê Jean-Noel Barrot, rêkeftina HSD û Şamê wekî "pêngaveke mezin" ber bi yekrêziya neteweyî û "aramiya Sûriyeyê" pênase kir.
Rêkeftina ku beşek ji wê bi navbeynkariya hewlên dîplomatîk ên Fransayê û li ser bingeha çarçoveyên berê yên Amerîkayê hat kirin, li Şamê di navbera Serokkomarê Demkî yê Sûriyeyê Ehmed Şer û Fermandarê Giştî yê HSDyê General Mezlûm Ebdî de hat îmzekirin.
Barrot li ser tora civakî X nivîsî, "Ev garantiyên siyasî û ewlehiyê dide hevkarên me yên Kurd di şerê li dijî DAIŞê de, hêzên wan tevlî artêşa Sûriyeyê dibin û dezgehên wan tevlî birêvebiriya sivîl dibin û mafên wan tên naskirin.”
Serokê Fransayê Emmanuel Macron jî cuda pîrozbayî li her du serkirdeyan kir û rêkeftin wekî “rêxweşker ji bo agirbesteke mayînde û tevlîkirina aştiyane ya Hêzên Sûriyeya Demokratîk" bi nav kir.
Serokkomarê Fransayê soz da ku Fransa dê piştgiriyê bide pêkanîna rêkeftinê û ducare kir ku ew piştgiriyê dide "Sûriyeyeke xwedî serwerî, yekgirtî û aram" ku rêzê li hemû pêkhateyan bigire û rûbirûyî terorê bibe.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse