گوتەبێژی هاوپەیمانیی نەسر: رێککەوتن لەسەر چەند بڕگەیەکی مادەی 14ـی رەشنووسی بودجە کراوە

 

شەوی چوارشەممە، 7-6-2023، د. سەلام زوبەیدی، گوتەبێژی هاوپەیمانیی نەسر کە حەیدەر عەبادی سەرۆکایەتی دەکات، بە تۆڕی میدیایی رووداوی راگەیاند: "لە کۆبوونەوەی ئەمڕۆی چوارچێوەی هاوئاهەنگی دا، زۆرینەی سەرکردەکانی چوارچێوە پابەندبوونی خۆیان بە رێککەوتنی سیاسیی نێوان هەرێمی کوردستان و چوارچێوەی هاوئاهەنگی دووپاتکردووەتەوە."

 

سەبارەت بە دەستکاریکردنی ئەو مادانەی پەیوەندییان بە هەرێمی کوردستانەوە هەیە لە رەشنووسی بودجەی 2023ـی عێراق، کە مادەکانی 13و 14یە و کێشە لەسەر چەند بڕگەیەکی مادەی 14 ماوە، روونیکردەوە: "بەپێی زانیارییەکان لەسەر بەشێکی زۆریان رێککەوتن کراوە، ئەوەی ماوەتەوە چەند بڕگەیەکی کەمە، رەنگە ئەوە بۆ لیژنەی دارایی و دەنگدان بمێنێتەوە."

 

د. سەلام زوبەیدی باسی ئەو خاڵانەی کرد کە رێککەوتنیان لەسەر کراوە و گوتی: "رێککەوتن کراوە 400 هەزار بەرمیل نەوتی کوردستان لە رێگەی کۆمپانیای نەوتی سۆمۆوە بە هاوئاهەنگی لەگەڵ وەزارەتی سامانە سرووشتییەکان هەناردە بکرێت یان لە نێوخۆدا ساخ بکرێتەوە، جگە لەوە کوردێک بە جێگری پۆستی بەڕێوەبەری کۆمپانیای سۆمۆ دیاری بکرێت."

 

سەبارەت بە کردنەوەی هەژماری بانکیش بۆ داهاتەکانی نەوتی کوردستان، گوتی: "رێککەوتنی چوارچێوەی هاوئاهەنگی و پارتی دیموکراتی کوردستان وایە کە هەژمارێکی بانکی لە بانکێک لە دەرەوەی عێراق بکرێتەوە، واتە رێککەوتنەکە وایە هەژمارەکە لە یەکێک لە بانکەکانی تورکیا بکرێتەوە."

 

گوتەبێژی هاوپەیمانیی نەسر دەشڵێت، "بەگشتی رێککەوتن کراوە کە بە سازان و بە رەچاوکردنی رێککەوتنی نێوان چوارچێوەی هاوئاهەنگی و پارتی دیموکراتی کوردستان رەشنووسی بودجە بنێردرێت بۆ لیژنەی دارایی پەرلەمان، چوارچێوەی هاوئاهەنگی دوای دەستکاریکردنی بەشێک لە بڕگەکان بڕیارە ئەمشەو رەوانەی لیژنەی دارایی بکات بۆ ئەوەی سبەی پێنجشەممە بخرێتە بەرنامەی کاری کۆبوونەوەی لیژنەکە کە پێش کۆبوونەوەی پەرلەمان دەبێت. بەشێک لە ناکۆکی و بڕگەکان کە هێشتا رێککەوتنیان لەبارەوە نەکراوە لە دانیشتنی پەرلەمان یەکلایی دەکرێتەوە."

 

شوان محەممەد، پەرلەمانتاری پارتی دیموکراتی کوردستان بە رووداوی گوت: "لێکنزیکبوونەوەی تەواو لەنێوان ئێمە و لایەنەکانی بەرامبەر هەیە، بەشێک لە بڕگەکانی مادەی 14 چارەسەر کراون، بەتایبەت ئەوانەی ئێمە پێمانوایە مەترسیین لەسەر قەوارەی هەرێمی کوردستان، بەشێکی دیکە رێککەوتنیان لەسەر نەکراوە و ماوەتەوە بۆ کۆبوونەوە و دانوستاندنی ئەمڕۆ و بەیانی، پێش کۆبوونەوەی پەرلەمان، بەڵام بەگشتی لێکنزیکبوونەوەی زۆر هەیە."

 

رەشنووسی بودجەی عێراق لە 13ـی مانگی ئادارەوە بۆ پەرلەمان نێردراوە، دوایینجار لیژنەی دارایی پەرلەمان لە 25ـی ئایاری ئەمساڵ لەبارەیەوە کۆبووەوە، ئەو کۆبوونەوەیە ناکۆکیی خستە نێو ئەندامانی لیژنەکە، بەتایبەت دوای گۆڕانکارییەکانی پەیوەست بە مادەکانی 13 و 14. هەرێمی کوردستان تێبینی لەسەر گۆڕانکارییەکانی لیژنەکە هەیە.

 

مادەی 13ـی رەشنووسەکە رێککەوتنی لەبارەوە کراوە و تەنیا مادە 14 ماوە، ئەویش بەشێکی بەپێی زانیارییەکانی رووداو چارەسەرکراون، هەرچی پەیوەندیی بە نەوتی کەرکووک و نەینەوا و بە هاوبەشی بەڕێوەبردنی دەروازە سنوورییەکان و گێڕانەوەی پاشەکەوتی مووچەی فەرمانبەرانە کە بەپێی دەستکارییەکەی لێژنەی دارایی دەبێت حکومەتی هەرێمی کوردستان لە بەشە بودجەی خۆی رێژەی 10٪ـی بگەڕێنێتەوە، هێشتا رێککەوتنی کۆتاییان لەبارەوە نەکراوە.