رووداو دیجیتاڵ
وەزیری دارایی عێراق لەبارەی مووچەی فەرمانبەرانەوە بە نووسراو داوای جێبەجێکردنی سێ خاڵ لە هەرێمی کوردستان دەکات.
تەیف سامی، وەزیری دارایی عێراق، رۆژی 03-02-2025 واژۆی لەسەر نووسراوەکە کردووە، نووسراوەکەشی بۆ نوێنەرایەتیی حکومەتی هەرێمی کوردستان ناردووە، کە تایبەتە خەمڵاندنەکانی مووچە، خانەنشینی، چاودێریی کۆمەڵایەتی و گرێبەستەکانی هەرێمی کوردستان بۆ ساڵی 2025.
لەنووسراوەکەدا، کە وێنەیەکی دەست تۆڕی میدیایی رووداو کەوتووە، بە ئاماژەدان بە نووسراوی نووسینگەی سەرۆکوەزیرانی عێراق بە ژمارە 2581254 لە 02-02-2025، وەزیری دارایی ئەو سێ داواکارییەی لە هەرێمی کوردستان:
1- پێدانی نووسراوی پارەدارکردنی مووچەی مانگی کانوونی دووەمی 2025ی فەرمانبەرانی هەرێمی کوردستان.
2- تەواوکردنی ناردنی داتای تایبەت بە جێکردن "تەوتین"ی فەرمانبەرانی هەرێمی کوردستان، بە گوێرەی ئەو میکانیزمەی کە لە بڕیاری دادگەی باڵای فیدراڵی دانراوە.
3- ناردنی داهاتی نانەوتی مانگی کانوونی دووەمی 2025 بۆسەر ئەو هەژمارەی کردوویانەتەوە لە بانکی ناوەندیی عێراق بە ژمارە ( 70018).
سۆران عومەر، ئەندامی لیژنەی ئابووریی پەرلەمانی عێراق و سەرۆکی فراکسیۆنی کۆمەڵی دادگەی لە پەرلەمانی عێراق ئەمڕۆ سێشەممە 11-02-2025 بە تۆڕی میدیایی رووداوی راگەیاند: "ئەمە نێوەڕۆکی رێککەوتنی نێوان هەردوو حکومەتی عێراق و هەرێمی کوردستانە لەبارەی مووچەوە و پێویستە هەردوولا پێوەی پابەند بن".
ئەنجوومەنی وەزیرانی هەرێمی کوردستان رۆژی چوارشەممەی رابردوو لە کۆبوونەوەی هەفتانەیدا بڕیاری دا بە زووترین کات داهاتی نانەوتیی مانگی کانوونی دووەمی 2025 بۆ گەنجینەی فیدراڵی بنێرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ