رووداو دیجیتاڵ
لە تورکیا و باکووری کوردستان بەهای لیرەی تورکی دابەزی و ژمارەیەکی پێوانەیی نوێی تۆمارکرد، یەک دۆلاری ئەمریکی بە زیاتر لە 34 لیرە مامەڵەی پێوە دەکرێت.
ئەمڕۆ دووشەممە 26ـی ئاب، لە بازاڕی ئازادی ئیستەنبووڵ یەک دۆلاری ئەمریکی بە 34.17 لیرە مامەڵەی پێوە کرا. لە هەمانکاتدا یەک یۆرۆ بەرامبەرە بە 37.98 لیرە.
بانکی وەبەرهێنانی ئەمریکی مۆرگان ستانلی لە سەرەتای ئەم مانگەدا پێشبینییەکانی بۆ دۆلار و لیرەی تورکی راگەیاند و پێشبینی کرد تاوەکو ناوەڕاستی ساڵی 2025 بەهای یەک دۆلاری ئەمریکی بگاتە 39 لیرەی تورکی.
بانکی ناوەندی تورکیاش لە کۆتایی مانگی حوزەیراندا پێشبینییەکانی بۆ بەهای دۆلار بۆ یەک ساڵ راگەیاند. بەپێی پێشبینییەکانی بانکەکە لە ماوەی ساڵێکدا بە بەهای یەک دۆلاری ئەمریکی بەرامبەر دەبێت بە 41.41 لیرەی وڵاتەکەی.
یەکێک لە هۆکارەکانی دیکەی دابەزینی لیرەی تورکی بەرامبەر بە دراوە بیانییەکان، جێگیرکردنی سووی بانکییە لەلایەن بانکی ناوەندیی تورکیا کە بۆ جاری پێنجەم لە ئاستی 50٪ هێشتییەوە.
نزیکەی 11 مانگە بەهای لیرەی تورکی بەرامبەر دۆلار و دراوە بییانییەکانی دیکە بەهۆی بەرزبوونەوەی قۆناخ بە قۆناخی هەڵاوسانی ئابووری وڵات و جێگیرکردنی سوودی بانکییەوە، لە دابەزیندایە. لیرەی تورکی لە 11 مانگی رابردوودا نزیکەی 12.2٪ی بەهای خۆی لەدەستداوە.
بەر لە هەڵبژاردنەکانی پەرلەمانی تورکیا لە 14ـی ئایاری 2023دا یەک دۆلار بە 19.60 لیرە مامەڵەی پێوە دەکرا؛ لە دووەم گەڕی هەڵبژاردنی سەرۆکایەتی تورکیا کە لە 28ـی ئایار کرا، بۆ یەکەمینجار بەهای یەک دۆلار 20 لیرەی تێپەڕاند و دوای هەڵبژاردنەکان بۆ یەکەمجار لە 26ـی حوزەیراندا بەهای یەک دۆلار گەیشتە 26 لیرە.
.jpg&w=3840&q=75)