ئابووری
رەجەب تەییب ئەردۆغان و محەممەد شیاع سوودانی لە کۆنفرانسێکی هاوبەشیاندا لە ئەنقەرە - 21ـی ئاداری 2023، وێنە: نووسینگەی ئەردۆغان
رووداو دیجیتاڵ
راوێژکاری سەرۆکوەزیرانی عێراق بۆ کاروباری دەرەوە دەڵێت، یەکێک لەو بابەتانەی لە کۆبوونەوەکەی رەجەب تەیب ئەردۆغان، سەرۆککۆماری تورکیا و محەممەد شیاع سوودانی، سەرۆکوەزیرانی عێراق باسی لێوە دەکرێت، هەناردەکردنەوەی نەوتی کوردستانە لە رێگەی بەندەری جەیهانەوە.
رۆژی یەکشەممە 30-7-2023، د. فەرهاد عەلائەدین، راوێژکاری سەرۆکوەزیرانی عێراق بۆ کاروباری پەیوەندییەکانی دەرەوە، لەبارەی سەردانە چاوەڕوانکراوەکەی رەجەب تەیب ئەردۆغان بۆ عێراق، بە تۆڕی میدیایی رووداوی راگەیاند، "هێشتا کاتی سەردانەکە دیاری نەکراوە، بەڵام بڕیارە لە داهاتوویەکی نزیکدا بێت."
سەبارەت بە بابەتەکانی جێگەی باسی ئەو کۆبوونەوانەی ئەردۆغان لەگەڵ بەرپرسانی عێراق تاوتوێیان دەکات، فەرهاد عەلائەدین گوتی، "ژمارەیەک پرس لە کۆبوونەوەکانی سەرۆککۆماری تورکیا و بەرپرسانی عێراق، بەتایبەت سەرۆکوەزیران باسدەکرێن لەنێویاندا پرسی ئابووری و ئاسایش؛ دەستپێکردنەوەی هەناردەکردنی نەوتی کوردستانیش یەکێک دەبێت لە پرسە ئابوورییەکان و لەگەڵ حکومەتی عێراق و سەرۆکوەزیرانی عێراق تاوتوێی ئەو بابەتە و ئاستەنگەکانی بەردەمی دەکرێت."
فەرهاد عەلائەدین ئاماژەی بۆ ئەوەش کرد پرسی سنوور و دەروازە سنوورییەکان، بابەتی ئاسایش و سەقامگیری و پرسە ئەمنییەکان بەگشتی لەو بابەتانە دەبن ئەردۆغان و بەرپرسانی عێراق باسیان دەکەن.
لە رۆژی 25ـی ئاداری ئەمساڵەوە بە لێکەوتەی بڕیاری دەستەی نێوبژیوانی پاریس، هەناردەی نەوتی کوردستان راگیراوە؛ لەو ماوەیەدا نزیکەی 3 ملیار دۆلار زیان بە هەرێمی کوردستان و عێراق کەوتووە. یاسای بودجەی ساڵی 2023ـی عێراقیش نەوتی کوردستانی بۆ هەناردەکردن یان بەکارهێنانی نێوخۆیی دیاریکردووە.
نەبیل مەرسوومی، شارەزای ئابووری و مامۆستای زانکۆی بەسرە لەبارەی سەردانەکەوە بە رووداوی گوت، "سەردانێکی یەکلاکەرەوە دەبێت بۆ زۆر پرس، لەنێویاندا بابەتی نەوت و وزە بە گشتی، چونکە تورکیا دەیەوێت بۆ پێدانی پشکی ئاوی عێراق، عێراق نەوتی هەرزانتر لە نرخی جیهانی پێ بدات؛ جگە لەوەش پرسی ئەو پێبژاردنەیە کە دادگەی پاریس بەسەر تورکیایدا سەپاند کە دەبێت بە عێراقی بدات، تورکیا دەیەوێت عێراق لەو یەک ملیار و 400 ملیۆن دۆلارەی بەسەریدا سەپێنرا، خۆش بێت."
رۆژی 25-7-2023، محەممەد شیاع سوودانی، سەرۆکوەزیرانی عێراق لەگەڵ عەلی رەزا گیونەی، باڵیۆزی تورکیا لە عێراق کۆبووەوە. بەپێی راگەیێندراوی نووسینگەی سوودانی، باسی ژمارەیەک پرسی هاوبەشی نێوان هەردوو وڵات کراوە، لەنێویاندا سەردانی سەرۆککۆماری تورکیا بۆ بەغدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ