رووداو دیجیتاڵ
لە چوار مانگی یەکەمی ئەم ساڵدا، عێراق نزیکەی 11 تریلیۆن دینار کورتهێنانی هەبووە، کە بە رێژەی 68% بەراورد بە هەمان ماوەی پار زیادی کردووە. لە 22 ساڵدا عێراق 3.4 کوادریلیۆن دینار داهاتی هەبووە، کە نزیکەی 2.3 تریلیۆن دۆلارە.
ئەم ئامارانە بەشێکن لەو خشتە مانگانەیەی بانکی ناوەندیی عێراق کە لەبارەی وردەکاریی داهات، خەرجی و کورتهێنان بڵاویکردوونەتەوە.
11 تریلیۆن دینار کورتهێنان لە چوار مانگدا
بەگوێرەی داتای بانکی ناوەندی، لە چوار مانگی یەکەمی ئەمساڵدا خەرجیی کرداری 91.6 تریلیۆن دینار بووە (نزیکەی شەش ملیار دۆلار)، لەکاتێکدا داهات 80.6 تریلیۆن دینار بووە (نزیکەی 5.7 ملیار دۆلار) و تێکڕای ئەو کورتهێنانەی کە هەژمارکراوە 10.9 تریلیۆن دینار بووە (نزیکەی 7.2 ملیار دۆلار).
لەو ماوەیەدا خەرجیی وەبەرهێنان 39.5 تریلیۆن دینار بووە، لەکاتێکدا داهاتی وەبەرهێنان تەنیا 435.7 ملیار دینار بووە.
خەرجیی رەوان (کە مووچە بەشێکێتی) لەو چوار مانگەدا 87.6 تریلیۆن دینار بووە، لەکاتێکدا داهاتی رەوان 80.2 تریلیۆن دینار بووە.
زۆرترین کورتهێنانی بودجە لەو چوار مانگەدا لە مانگی نیساندا بووە کە 6.6 تریلیۆن دینار بووە، کەمترینیشی لە مانگی کانوونی دووەمدا بووە کە 339 ملیار دینار بووە.
زۆربوونی کورتهێنان لە مانگەکانی ئادار و نیساندا پەیوەندیدارە بە دەستپێکردنی جەنگی ئێران لەگەڵ ئەمریکا و ئیسرائیل، کە بەهۆیەوە تەنگەی هورمز داخرا، کە سەرچاوەی هەناردەی نزیکەی 90%ی نەوتی عێراقە.
خشتەی ئاماری کورتهێنانی چوار مانگی سەرەتای ساڵی رابردوو دەریخستووە کە کورتهێنان ئەو کاتە 3.5 تریلیۆن دینار بووە؛ بەوپێیەی کورتهێنانی چوار مانگی یەکەمی ئەم ساڵ 7.4 تریلیۆن دینار زیادی کردووە، رێژەی زیادکردنەکە دەکاتە 68%.
داهات و خەرجی 22 ساڵ
ئامارەکەی بانکی ناوەندی کۆی داهاتی ساڵی 2004 تاوەکو مانگی شوباتی 2026ی تۆمار کردووە.
داهاتی ئەو 22 ساڵەی عێراق بەگوێرەی خشتەکە سێ کوادریلیۆن و 474 تریلیۆن و 608 ملیار و 569 ملیۆن دینار بووە لەو ماوەیەدا خەرجیی عێراق سێ کوادریلیۆن و 293 تریلیۆن و 448 ملیار و 40 ملیۆن دینار بووە، بەمەش داهاتەکەی بەراورد بە خەرجییەکەی، زیاتر لە 181 تریلیۆن زیاتر بووە.
