رووداو دیجیتاڵ
خالید سێدۆ، ئەندامی ئێزدیی پەرلەمانی عێراق دەڵێ، سێ داواکارییان داوەتە حکومەتی فیدراڵی بۆ ئەوەی لە بودجەی نوێدا جێی بکرێنەوە.
خالید سێدۆ، پەرلەمانتاری ئێزدی، رۆژی شەممە، 10-10-2026، بە تۆڕی میدیایی رووداوی گوت: "سێ داواکاریمان پێشکێشی حکومەتی فیدراڵی کردووە بۆ ئەوەی لە بودجەدا جێیان بکرێتەوە. یەکەمیان دامەزراندنی 1000 پۆلیسە لە قەزای شنگال، ئەمەش لە چوارچێوەی رێککەوتنی شنگالدایە."
خالید سێدۆ گوتی: "داواکاریی دووەم تایبەتە بە گرێبەستی 17 هەزار کەس و دامەزراندنیان بە شێوەی هەمیشەیی لە فەرمانگە جیاوازەکانی پارێزگای نەینەوا، کە پشکی قەزای شنگال 1376 کەسە."
خالید سێدۆ ئاماژەی بەوەشکرد: "داواکاریی سێیەم بریتییە لە تەرخانکردنی پشکێک لە بودجە بۆ ئاوارەکان و گەڕاندنەوەیان بۆ ناوچەکانیان و قەرەبووکردنەوەیان و رەخساندنی دۆخی گونجاو بۆیان،" و ئاماژەی بەوەشکرد، "رەشنووسی بودجە هێشتا لای حکومەتە و نەگەیشتووەتە پەرلەمانی عێراق."
ئەو پەرلەمانتارە گوتی، هەمیشە هەوڵ دەدەن پرسی ئاوارە ئێزدییەکان لەگەڵ وەزارەتی کۆچ و کۆچبەران تاوتوێ بکەن، بەڵام ئێستا بەهۆی نەبوونی وەزیرەوە پەیوەندیکردن لەمبارەیەوە قورسە.
