رووداو دیجیتاڵ
مووچە، بودجە، داهات، نەوت و بەڕێوەبردنی، ئەو پێنج پرسە سەرەکییە بوون کە مەسرور بارزانی، سەرۆکی حکومەتی هەرێمی کوردستان لە بەغدا لەگەڵ سەرۆکوەزیرانی عێراق باسی کردن. عەلی زەیدی، سەرۆکوەزیرانی عێراق دەڵێ، تێڕوانینیان وایە تاوەکو ساڵی 2032 بەرهەمهێنانی رۆژانەی نەوت بگەیێننە 10 ملیۆن بەرمیل، کە دوو ملیۆن بەرمیلی لە کێڵگەکانی هەرێمی کوردستانە.
دووشەممە 9ی تشرینی دووەمی 2026، مەسرور بارزانی بە سەرۆکایەتى شاندێک سەردانی بەغدای کرد و هەر ئەمڕۆش لەگەڵ عەلی زەیدی، سەرۆکوەزیرانی عێراق کۆبووەوە.
نووسینگەی رۆژنامەڤانیی سەرۆکوەزیرانی عێراق بڵاویکردەوە: "لەو کۆبوونەوەیەدا عەلی فالح زەیدی پەرۆشیی زۆری حکومەتەکەی بۆ هێنانەکایەی دادپەروەری و گەرەنتیی مافی دەستووریی هاووڵاتییان و دامەزراوەکانی هەرێمی کوردستان و کارکردن بۆ چارەسەری سەرجەم دۆسیە هەڵپەسێردراوەکان دەربڕی، بە جۆرێک بەرژەوەندیی نیشتمانیی باڵا بۆ هەموو گەلی عێراق بێتەدی".
بەگوێرەی راگەیێندراوەکە، لەو کۆبوونەوەیەدا پێنج دۆسیەى سەرەکی تاوتوێ کراون، کە ئەوانیش بەڕێوەبردنی کێڵگەکانی نەوت و رێکخستنیان بەگوێرەی ئەوەی لە دەستووردا هاتووە.
دۆسیەى دووەم، پرسی داهاتی نەوتی و نانەوتی بووە و باس لە میکانیزمی رێکخستنی داهات و هاوئاهەنگی لە بەڕێوەبردنی لەنێوان وەزارەتی دارایی هەردوو حکومەت کراوە.
سێیەم دۆسیە مووچەی مووچەخۆرانی هەرێمی کوردستان بووە و جەخت لەوە کراوەتەوە کە گەرەنتیی بەردەوامیی خەرجکردنی ئەو مووچەیە بدرێ. هاوشێوەی فەرمانبەرانی دیکەی عێراق.
چوارەم دۆسیە کە باس کراوە بودجەی گشتیی 2027ـی عێراق بووە و باس لە پشکی هەرێمی کوردستان و شێوازی رێکخستنی کراوە بەگوێرەی دەستوور و بەشێوەیەک کە بەرژەوەندیی پێکهاتەکان بهێنێتەدی.
پێنجەم دۆسیە کە لەو کۆبوونەوەیە باس کراوە پڕۆژەیاسای نەوت و گاز بووە و هەردوولا جەختیان لە گرنگیی پەلەکردن کردووەتەوە بۆ دەرچوواندنی ئەو پڕۆژە یاسایە، بەشێوەیەک کە کێشەکانی پەیوەندیدار بە بەرهەمهێنانی نەوت، هەناردەکردنی و رێکخستنی بەڕێوەبردنی سامانی نەوتی چارەسەر بکات.
عەلی فالح زەیدی رایگەیاند، تێڕوانینیان وایە تاوەکو ساڵی 2030 بەرهەمهێنانی رۆژانەى نەوت بگەیێننە حەوت ملیۆن بەرمیل، هەروەها بۆ ساڵی 2032 بەرهەمهێنانەکە بۆ 10 ملیۆن بەرمیل نەوت بەرز بکەنەوە بە بەرهەمی کێڵگەکانی نەوتی هەرێمی کوردستانیشەوە کە دوو ملیۆن بەرمیل نەوت دەبێت.
نووسینگەی رۆژنامەڤانیی سەرۆکوەزیرانی عێراق رایگەیاند، هەردوولا رێککەوتوون میکانیزمێکی گونجاو بۆ چارەسەری سەرجەم کێشەکانی نێوان هەردوو حکومەتی فیدراڵ و حکومەتی هەرێمی کوردستان بەگوێرەی دەستوور و یاسا دابنێن.
عەلی فالح زەیدی و مەسرور بارزانی سەرکۆنەی هێرشکردنە سەر کێڵگەی کۆرمۆریان کردووە و بە گرنگییان زانیوە دامەزراوەکان و ژێرخانەکەی بپارێزرێ و رێوشوێن بگیرێتەبەر بۆ رێگری لە دووبارەبوونەوەی ئەو جۆرە هێرشانە.
شەوی یەکشەممە 9ى تشرینى دووەم هێرش کرایە سەر کێڵگەی کۆرمۆر لە سنووری پارێزگای سلێمانی و بەو هۆیەوە کێشە بۆ بەرهەمهێنانی کارەبا لەهەرێمى کوردستان دروست بوو.
