تۆم باراک: گفتوگۆی راستەوخۆی هەولێر و بەغدا رێگەی چارەسەرکردنی کێشەی مووچە و نەوتە

رووداو دیجیتاڵ 

تۆم باراک، نێردەی ئەمریکا بۆ کاروباری عێراق رایگەیاند، گفتوگۆی راستەوخۆی نێوان هەولێر و بەغدا رێگەی چارەسەرکردنی پرسە ئاڵۆزەکانی وەک هەناردەکردنی نەوت، مووچە و داهاتە، هاوکات ستایشی هەوڵەکانی مەسرور بارزانی، سەرۆکوەزیرانی هەرێمی کوردستان و عەلی زەیدی، سەرۆکوەزیرانی عێراقی کرد.

باراک لە پەیامێکدا لە تۆڕی کۆمەڵایەتیی ئێکس، بە ئاماژەدان بە کۆبوونەوەی ئەمڕۆی نێوان سەرۆکوەزیرانی هەرێمی کوردستان و سەرۆکوەزیرانی عێراق لە بەغدا، نووسیویەتی: "گفتوگۆی راستەوخۆی نێوان بەغدا و هەولێر رێگەی چارەسەرکردنی پرسە سەختەکانە؛ لەوانەش هەناردەکردنی نەوت، مووچە و داهاتەکان."

باراک کە هاوکات باڵیۆزی ئەمریکایە لە تورکیا و نێردەی تایبەتیشە بۆ سووریا، جەختی لە پشتیوانیی وڵاتەکەی کردەوە و گوتی: "سەرۆکوەزیران زەیدی و مەسرور بارزانی، سەرۆکوەزیرانی هەرێمی کوردستان ئەمڕۆ ئەو سەرکردایەتییەیان نیشاندا. ویلایەتە یەکگرتووەکانی ئەمریکا لەگەڵ هەردوولادایە لە کاتێکدا پێکەوە عێراقێکی خاوەن سەروەری و خۆشگوزەران بنیاتدەنێن."

ئەم لێدوانەی باڵیۆزی ئەمریکا هاوکاتە لەگەڵ سەردانەکەی سەرۆکوەزیرانی هەرێمی کوردستان بۆ بەغدا بە مەبەستی گەیشتن بە رێککەوتنی کۆتایی لەسەر دۆسیەی مووچەی مووچەخۆران، پشکی هەرێمی کوردستان لە بودجەی گشتی و شایستە داراییەکانی پەیوەست بە هەناردەکردنەوەی نەوت.