رووداو دیجیتاڵ
نوێنەری جووتیارانی تەپەسەوز لە خورماتوو رایگەیاند: کوردێک لەو قەزایە لەسەر سکاڵای عەرەبی هاوردە و لەسەر کێشەی زەوی بە بەندکردن سزادراوە کە زەوی نییە و 25 ساڵیشە لە خورماتوو نیشتەجێ نییە.
ئەحمەد جومعە، نوێنەری جووتیارانی تەپەسەوز بە تۆڕی میدیایی رووداوی رایگەیاند: بورهان عیزەدین کە کوردێکی خورماتووە لەلایەن دادگەی تکریتەوە بە شەش مانگ بەندکردن سزادراوە، بە تاوانى ئەوەی زەوی عەرەبە هاوردەکان بەکاردەهێنێت، لەکاتێکدا ئەو هاووڵاتییە زەوی کشتوکاڵی نییە و 25 ساڵە لە کەرکووک دەژی و ئەرکى فەرمی لە خورماتووە.
ئەو کێشەیەی نێوان عەرەبە هاوردەکان و جووتیارانی کورد لەسەر 45 دۆنم زەوییە لە گوندی تەپە سەوز، کە بەشێکى ئەحمەد جومعە خاوەندارێتی دەکات.
نوێنەری جووتیارانی تەپەسەوز رایگەیاند کە بە "هەڵە" ناوی بورهان عیزەدین دراوە و پێشتر لە ساڵی 2019 لە دادگەی خوماتوو بڕیار لە بارەیەوە دەرچووە و سزاکە راگیراوە، بەڵام عەرەبە هاوردەکان لە دادگەی تێهەڵچوونەوەی تکریت تانەیان لە بڕیارەکە داوەو بانگەشەی ئەوە دەکەن کە ساڵێک ئەو کەسە زەوی ئەوانی چاندووە.
کێشەی جووتیارانی کورد لە خورماتوو لەسەر ئەو زەویانەیە، کە مادەی 140 دەیانگرێتەوە، بەر لە ساڵی 2003 زۆربەی ئەو زەویانە لەلایەن عەرەبی هاوردە دەستیان بەسەردا گیراوە، دواتر کورد گەڕاوەتەوە سەر زەوییەکانیان، بەڵام عەرەبە هاوردەکان لەدژیان سکاڵا تۆمار دەکەن بۆ دەستبەسەرداگرتنەوەی.
