یەکێتیی نیشتمانیی کوردستان: بەشداریی دانیشتنی سبەی پەرلەمان ناکەین

یەکێتیی نیشتمانیی کوردستان لە راگەیێندراوێکدا بڕیاری بەشدارینەکردنی لە کۆبوونەوەی سبەی پەرلەمانی کوردستاندا داوە و کۆبوونەوەکە بە "نایاسایی" و دوور لە بنەماکانی شەراکەتی راستەقینە وەسف دەکات.

دکتۆر ڤالا فەرید، سەرۆکی فراکسیۆنی پارتی لە پەرلەمانی کوردستان، ئەمڕۆ سێشەممە 03-11-2026 لە کۆنفرانسێکی رۆژنامەڤانیدا رایگەیاند، بانگهێشتی سەرجەم فراکسیۆنەکان دەکەن بۆ دانیشتنی پەرلەمان.

هەر ئەمڕۆ سەرۆکایەتیی دیوانی پەرلەمانی کوردستان لە راگەیێندراوێکدا رایگەیاند: "بانگهێشتی گشت ئەندامە بەڕێزەکانی پەرلەمان دەکەین بۆ تەواوکردنی بڕگەکانی دانیشتنی (یەکەم)ی خولی پاییزەی ساڵی یەکەم لە خولی هەڵبژاردنی شەشەمی پەرلەمانی کوردستان - عێراق، لە کاژێر 11:00ی پێشنیوەڕۆ، رۆژی چوارشەممە 04-11-2026، تکایە لە کاتی دیاریکراودا ئامادەبن".

یەکێتیی نیشتمانیی کوردستان لە راگەیێندراوەکەیدا وەکو کاردانەوەیەک بۆ کاراکردنەوەی پەرلەمان بەبێ ئەوان، لە راگەیێندراوەکەیدا دەڵێ: هاووڵاتییانی هەرێمی کوردستان ئاگادارن کە سبەی 4-11-2026 دەنگۆی بە نایاسایی کۆبوونەوەی پەرلەمانی کوردستان هەیە. یەکێتی جەخت لەسەر باوەڕی قووڵی خۆی بە بنەماکانی سەروەریی یاسا و سازانی نیشتمانی دەکاتەوە. "ئەم کۆبوونەوەیە نایاساییە و دوورە لە بنەماکانی شەراکەتی راستەقینە و هەوڵێکە بۆ سەپاندنی ئیرادەی لایەنێک."

لە پەیامەکەدا هاتووە: "هاووڵاتییانی هەرێمی کوردستان و تەواوی هێزە سیاسییەکان ئاگادار دەکەینەوە کە ئێمە وێڕای بەشدارینەکردنمان، روو دەکەینە هەر دڵسۆز و هێزێکی نیشتمانی، کە خەمی قەوارەی هەرێمی کوردستانیەتی، بەشداریی تێدا نەکات."

یەکێتیی نیشتمانیی کوردستان پێیوایە دانیشتنی پەرلەمان ئەوکات سەنگی دەبێت کە "سازانی نیشتمانی لەسەر بێت" و هەموو لایەنە هەڵبژێردراوەکان بە ئیرادەی ئازاد و دیموکراسییانە بەشداریی تێدا بکەن.

لە کۆتایی راگەیێندراوەکەدا هاتووە: "ئەگەر بنەمای دیموکراسی ئەوە بێت کە بە کڕین و هەڕەشە و گوشاری دەروونی کاریگەری بخرێتە سەر بڕیارەکانی پەرلەمانتاران، ئەوا لەو چوارچێوە کارتۆنییەدا، دان بە هیچ پەرلەمان و حکومەتێک نانێین کە دەرئەنجامی ئەو جۆرە کۆبوونەوانە بێت."

بۆ کۆبوونەوەی پەرلەمانی کوردستان دەبێت 50+1 ئامادە بن، واتا 51 پەرلەمانتار، پارتی 39 کورسیی بەدەستهێناوە و پەرلەمانتارەکەی سۆسیال دیموکرات رایگەیاندووە ئامادە دەبێت، هەروەها بڕیارە بەشێکی پێکهاتەکان ئامادەبن و ناوی سێ پەرلەمانتاری یەکێتی و نەوەی نوێش دەهێندرێ بەشداری کۆبوونەوەکەن، یەکێکیان هەردی سەڵاحە و ئەمڕۆ بە فەرمی کشانەوەی لە فراکسیۆنی یەکێتی راگەیاند، ناوی دوو پەرلەمانتاری نەوەی نوێش دەهێندرێت بەشداری بکەن، بەڵام فراکسیۆنەکەیان دەڵێت: "ناڕاستە".

سەرۆکی فراکسیۆنی پارتی لە کۆنفرانسە رۆژنامەڤانییەکەدا گوتی، داوا دەکەن سبەی چوارشەممە هەموو پەرلەمانتاران لە هۆڵی پەرلەمان ئامادەبن بۆ کۆبوونەوەی تەواوکاری رێکارەکانی دانیشتنی یەکەمی خولی شەشەم.

لە 20-10-2024 هەڵبژاردنی پەرلەمانی کوردستان بەڕێوەچوو؛ 02-12-2024، یەکەم دانیشتنی خولی شەشەمی پەرلەمانی کوردستان کرا و تاوەکو ئەمڕۆ کۆبوونەوەی دیکە نەکراوە.

لە کۆبوونەوەی یەکەمی پەرلەمانی کوردستاندا، دەرگەی خۆبەربژێرکردن بۆ دەستەی سەرۆکایەتی کرایەوە و هەریەکە لە فراکسیۆنەکانی پارتی دیموکراتی کوردستان، یەکێتیی نیشتمانیی کوردستان، نەوەی نوێ و پێکهاتەکان بەربژێری خۆیان تۆمار کرد.