خۆپیشاندانی شۆفێرانی بارهەڵگر لە بازگەی دارەمان لەسەر رێگای کەرکووک-هەولێر گرژیی لێکەوتەوە

رووداو دیجیتاڵ

خۆپێشاندانێکی شۆفێرانی بارهەڵگر لە بازگەی دارەمان لەسەر رێگای کەرکووک-هەولێر گرژیی لێکەوتەوە، دوای ئەوەی پۆلیسێک بە زللـە لە یەکێک لە شۆفێرەکان دەدات. بە گوتەی شۆفێرەکان، دوو شۆفێری دیکەش دەستبەسەرکراون و بە زەبری هێز کۆتایی بە خۆپێشاندانەکەیان هێنراوە.

شۆفێرەکان لە دژی رێکار و رێگرییەکانی گومرگ و بازگەکە ناڕەزایەتییان دەربڕی و بۆ ماوەیەک رێگای سەرەکیی نێوان کەرکووک و هەولێریان داخست.

عەبدولباست تەها، یەکێک لە شۆفێرە خۆپێشاندەرەکان دەڵێت، "ئەمانە بەمەبەست وا دەکەن، خەڵک دوادەخەن و ئازاری شۆفێر دەدەن. شۆفێرێک لێرە دوو رۆژ لە نۆرەدا دەوەستێت، کە دەیەوێت رێگایەک بۆ دەربازبوون بدۆزێتەوە، دەیگرن و لێی دەدەن".

گرتەیەکی ڤیدیۆیی کە لە تۆڕە کۆمەڵایەتییەکاندا بڵاوبووەتەوە، دەریدەخات پۆلیسێک بە زللـە لە شۆفێرێک دەدات. شۆفێرەکان دەڵێن، لەلایەن ئەفسەرانی پلە باڵاشەوە سووکایەتییان پێکراوە.

باسم جەعفەر، شۆفێرێکی دیکەیە و دەڵێت، "ئەفسەر بە پلەی عەقید و ملازم لە شۆفێر دەدات. دواتر بە یەخە رادەتکێشن و دەتخەنە نێو ئۆتۆمبێلەوە، تەنیا لەبەر ئەوەی داوای مافی خۆمان دەکەین".

دوای بڵاوبوونەوەی گرتە ڤیدیۆییەکە، لیژنەیەکی لێکۆڵینەوە لەسەر رووداوەکە پێکهێنرا و ئەو پۆلیسەی کە لە شۆفێرەکەی دابوو، بۆ ماوەی پێنج رۆژ دەستبەسەرکرا.

مازن غەریب، ئەندامی پەرلەمانی عێراق رایگەیاند، "لەگەڵ فەرماندەی پۆلیسی کەرکووک قسەم کرد و پێم گوت ئەم بابەتە جێگەی قبووڵ نییە. ئەویش هەمان بۆچوونی منی هەبوو و راستەوخۆ بڕیاری دەستبەسەرکردنی پۆلیسەکەی بۆ ماوەی پێنج رۆژ دەرکرد. ئێمەش لەسەر هێڵ دەبین تاوەکو ئەو پۆلیسە سزا دەدرێت".

رۆژانە بە دەیان بارهەڵگر بۆ ماوەی چەندین کاژێر لە نۆرەی دوور و درێژی گومرگ و بازگەکانی سنووری پارێزگای کەرکووک رادەگیرێن. هەندێکجار بەهۆی کارنەکردنی ئامێری سۆنارەوە، ناچار دەبن زیاتر لە رۆژێک لە نۆرەدا بمێننەوە.