رووداو دیجیتاڵ
مەسرور بارزانی، سەرۆکوەزیرانی هەرێمی کوردستان، پێشوازیی لە مارات راژبادینۆڤ، کونسوڵی گشتیی نوێی رووسیا لە هەرێمی کوردستاندا کرد و پشتیوانیی حکومەتی بۆ سەرخستنی ئەرکەکەی دەربڕی.
بەگوێرەی راگەیێندراوێکی حکومەتی هەرێمی کوردستان، دیدارەکە ئەمڕۆ یەکشەممە، 22ـی تشرینی دووەمی 2026، بەڕێوەچووە و تێیدا مەسرور بارزانی پیرۆزبایی دەستبەکاربوونی لە کونسوڵی گشتیی رووسیا کردووە و هیوای سەرکەوتنی بۆ خواستووە.
لە راگەیێندراوەکەی حکومەتی هەرێمی کوردستاندا هاتووە: "لە دیدارەکەدا هەردوولا جەختیان لە گرنگیی بەرەوپێشبردنی زیاتری پەیوەندی و دۆستایەتیی لەمێژینەی نێوان کوردستان و رووسیا کردەوە. کونسوڵی گشتیی رووسیاش خۆشحاڵیی خۆی بە دەستبەکاربوونی لە هەرێمی کوردستان نیشاندا و خواستی وڵاتەکەی بۆ پتەوکردنی پەیوەندیی دوولایەنە لە بوارە جۆراوجۆرەکاندا دووپاتکردەوە."


