لە کۆیە دوو کەس بە رووداوی هاتووچۆ گیانیان لەدەستدا

رووداو دیجیتاڵ

جێگری بەڕێوەبەری گشتیی تەندروستیی کۆیە رایگەیاند، بەهۆی رووداوێکی هاتووچۆەوە دوو کەس گیانیان لەدەستدا و کەسێکی دیکەش بریندار بوو.

ئێوارەی شەممە، 11ـی تەممووزی 2026، شێروان جەلال، جێگری بەڕێوەبەری گشتیی تەندروستیی کۆیە بە تۆڕی میدیایی رووداوی راگەیاند، رووداوەکە لەنزیک گوندی چنارۆکی سنووری کۆیە روویدا و لە جۆری پێکدادان بووە.

شێروان جەلال گوتی: "دوو کەس گیانیان لەدەستداوە، یەکێکیان شۆفێر بووە و ئەوەی دیکە سەرنشین، هەروەها کەسێکی دیکەش بریندار بووە."

جێگری بەڕێوەبەری گشتیی تەندروستیی کۆیە ئاماژەی بەوەش کرد، تەرمەکان رەوانەی دادپزیشکی کراون و رێکاری پێویست گیراوەتەبەر.