رووداو دیجیتاڵ
سوپای ئەمریکا رایگەیاند، دوێنێ بە بەکارهێنانی چەند درۆنێکی دەریایی، هێزەکانی سێنتکۆم بە سەرکەوتوویی دامەزراوەیەکی چاککردنەوەی ژێردەریایی و کەشتییان لە ئێران کردە ئامانج.
رۆژی دووشەممە 13-07-2026، سێ بەلەمی بێسەرنشینی جۆری کۆرسێر (Corsair) لە بەندەری بنکەی دەریایی بەندەر عەباسـیان داوە، ئەمەش یەکەمجارە هێزەکانی ئەمریکا درۆنی دەریایی لە ئۆپەراسیۆنە جەنگییەکاندا بەکاربهێنن.
سێنتکۆم رایگەیاند: "هێرشەکانمان توانای ئێرانیان بۆ هێرشکردن کەمکردەوە."
فراوانبوونی هێرشەکانی ئەمریکا
رۆژی دووشەممە 13-07-2026، هێرشەکانی ئەمریکا بۆ سەر ئێران بۆ دووەم رۆژ لەسەریەک بەردەوام بوون. هێرشەکانی ئەمریکا لە باشووری ئێرانەوە بەرەو ناوچەکانی نێوەڕاست و رۆژئاوای وڵاتەکە فراوان بوون.
لە پارێزگەی خوزستان، نیوەڕۆی رۆژی دووشەممە هێزەکانی ئەمریکا سێ شوێنیان لە شاری ئابادان کردە ئامانج، کە بەهۆیەوە دوو کەس کوژران و سێ کەسی دیکەش بریندار بوون. هەروەها، بۆ دووەم رۆژ هێرشی درۆنی کرایە سەر ناوچەی خونداب، کە دامەزراوەی ئاوی قورسی ئەراکی لێیە، بەبێ ئەوەی زیانی گیانی لێبکەوێتەوە.
لەلایەکی دیکەوە، میدیای ئێران رایگەیاند، دەنگی چەندین تەقینەوەی بەهێز لە شارەکانی بەندەر عەباس، حاجی ئاباد، بەندەری لەنگە و دوورگەکانی قیشم و فارور بیستراون.
کاردانەوەکانی ئێران و بەئامانجگرتنی وڵاتانی کەنداو
لە بەرامبەر ئەم هێرشانەدا، سوپای ئێران رایگەیاند، سیستمی بەرگریی ئاسمانی لە بەندەر عەباس توانیویەتی درۆنێکی ئەمریکی لە جۆری لوکاس (Lucas) بخاتە خوارەوە.
لەلایەکی دیکەوە، هێزە چەکدارەکانی ئێران چەندین هێرشیان کردە سەر بەرژەوەندییەکانی ئەمریکا لە وڵاتانی کەنداو. سوپای پاسداران رایگەیاند، هێرشیان کردووەتە سەر بەحرێن، ئوردن و کوێت. سوپای ئوردن رایگەیاند، چوار مووشەکی ئێرانییان تێکشکاندووە، لە کاتێکدا زەنگی ئاگادارکردنەوە لە بەحرێن لێدرا.
گرژییەکانی تەنگەی هورمز
ئەم پێشهاتانە لە کاتێکدان، ناکۆکییەکان لەسەر کۆنترۆڵکردنی تەنگەی هورمز وەک رێڕۆیەکی گرنگی بازرگانیی وزە بەردەوامە. تەلەڤیزیۆنی فەرمیی ئێران بڵاویکردەوە، هێزی دەریایی سوپای پاسداران وەک ئاگادارکردنەوە تەقەی لە دوو کەشتی کردووە کە "هەوڵیان دەدا بە شێوەیەکی نایاسایی بە تەنگەکەدا تێپەڕن."
سوپای پاسداران پێداگرە لەسەر ئەوەی تەنگەکە داخراوە، بەڵام ویلایەتە یەکگرتووەکانی ئەمریکا دەڵێ ئەو رێڕۆیە ئاوییە بەڕووی هاتووچۆی دەریاییدا کراوەیە.
بەهۆی ئەم گرژییانەوە، نرخی نەوتی خاوی ئەمریکی (WTI) 4.5٪ بەرزبووەوە و گەیشتە سەرووی 74 دۆلار بۆ هەر بەرمیلێک.
.jpg&w=3840&q=75)