رووداو دیجیتاڵ
فەرماندەی هێزی وشکانیی ئێران دەڵێت، یەکەکانیان لە سەرانسەری سنووری وڵاتەکە جێگیر کراون؛ هۆشداریش دەدات، ئامادەیی تەواویان بۆ رووبەڕووبوونەوەی هەر هێرشێکی زەوینی هەیە.
رۆژی پێنجشەممە، 03-09-2026، عەلی جەهانشاهی، فەرماندەی هێزی وشکانیی سوپای ئێران، سەردانی سنوورەکانی رۆژئاوای ئێران و رۆژهەڵاتی کوردستانی کرد.
لە سەردانەکەیدا، عەلی جەهانشاهی ئاماژەی بە هەڕەشەکانی بەرپرسانی ئەمریکا و ئیسرائیل کرد لە وڵاتەکەی و رایگەیاند: ''یەکەکانی هێزەکەمان لە سەرانسەری سنوورەکانمان جێگیر کراون و ئامادەین بۆ رووبەڕووبوونەوەی هەر دەستدرێژی و هێرشێکی زەوینی.''
جەهانشاهی ئەوەشی خستەڕوو، لە دۆخی ئێستا ئەرکی هێزی وشکانیی سوپای ئێران هەستیارە و ''بەردەوام چاودێریی پێشهاتەکانی ناوچەکە دەکەن.''
فەرماندەی گشتیی هێزەکانی وشکانیی سوپای ئێران هۆشداریش دەداتە ئەمریکا، لە ئەگەری هەر هێرشێکدا بۆ سەر خاکی وڵاتەکەی، وەڵامێکی ''تووند و یەکلاکەرەوە''ـیان دەبێت.
هەڕەشەکانی عەلی جەهانشاهی لەکاتێکدان، دووبارە گرژییەکانی نێوان تاران و واشنتن گەیشتوونەتە لووتکە و شەوی سێشەممە 1ـی ئەیلوول ئەمریکا دەستی بە شەپۆلێکی هێرش کردەوە بۆ سەر پارێزگاکانی باشووری ئێران.
لە وەڵامدا هێزە چەکدارەکانی ئێرانیش، بە پاساوی تێکدانی بەرژەوەندییەکانی ئەمریکا، بە درۆن و مووشەک هێرشیان کردە سەر وڵاتانی ناوچەکە، لەوانەش هەرێمی کوردستان، بەحرێن، کوێت و ئیمارات.
هاوکات دوێنێ چوارشەمە بنیامین نەتەنیاهوو، سەرەۆکوەزیرانی ئیسرائیل لە هەڕەشەیەکی تووندا رایگەیاند، ستراتیژییان رووبەڕووبوونەوەی راستەوخۆی تاران و بڕینی "قۆڵەکانی" ئێرانە لە ناوچەکەدا. گوتیشی، هێزە ئاسمانییەکانیان لە هەر ساتێکدا بێت ئامادەن بۆ بۆردوومانکردنەوەی ئێران.
