قالیباف بۆ جەی دی ڤانس: واز لە گوتاری نمایشکارانە بهێنە؛ بۆچی ئەمە بە سەرۆکەکەت ناڵێیت؟

رووداو دیجیتاڵ

محەممەدباقر قالیباف، سەرۆکی پەرلەمانی ئێران، لە کاردانەوەیەکدا بەرامبەر بە لێدوانەکانی جەی دی ڤانس، جێگری سەرۆکی ئەمریکا، سەبارەت بە پەیوەندیی جەنگی ئێران و شکستی کۆمارییەکان لە هەڵبژاردندا، ڤانس بە "قومارچییەکی دۆڕاو" دەچوێنێت.

رۆژی پێنجشەممە، 5ـی تشرینی دووەمی 2026، محەممەدباقر قالیباف لە تۆڕی کۆمەڵایەتیی ئێکس نووسی: "سەرۆکەکەت خەریکی ئامادەکردنی قۆناخی داهاتووی جەنگە، لە کاتێکدا ئەمریکا لەسەر لێواری هەڵدێری سیاسەتی سەرەتا ئیسرائیلدایە."

قالیباف رووی لە ڤانس کرد و گوتی: "واز لە گوتاری نمایشکارانە بهێنە. بۆچی ئەمە بە سەرۆکەکەت ناڵێیت؟"

دوێنێ چوارشەممە، 4ـی تشرینی دووەمی 2026، جەی دی ڤانس هۆکاری سەرەکیی شکستی کۆمارییەکان لە هەڵبژاردنەکانی نیوەخولدا بۆ جەنگی ئێران و بەرزبوونەوەی تێچووی بژێوی گەڕاندەوە. بە گوتەی ڤانس، دەنگدەران بەهۆی ئەو بارودۆخەوە سزای کۆمارییەکانیان داوە. ئەو ئاماژەی بە 4 داواکاریی سەرەکیی دەنگدەران کرد: کۆتاییهێنان بە جەنگ، چارەسەرکردنی هەڵاوسان، بەرزکردنەوەی ناوی دروشمی "ئەمریکا لە پێشینەیە" و گۆڕینی شێوازی پەیوەندییەکان لەگەڵ سعوودیە و ئیسرائیل.

لە هەڵبژاردنەکانی 3ـی تشرینی دووەمی 2026دا، کۆمارییەکان زۆرینەیان لە ئەنجوومەنی پیران و نوێنەران لەدەست دا. ئەم بارودۆخە سیاسییە لە کاتێکدایە کە دوای هێرشەکانی 28ـی شوباتی ئەمریکا و ئیسرائیل بۆ سەر ئێران، تەنگەی هۆرموز لەلایەن تارانەوە بە رووی کەشتییەکاندا داخراوە. ئەم هەنگاوە بووەتە هۆی بەرزبوونەوەی نرخی سووتەمەنی و گوشارێکی زۆری دارایی لەسەر هاووڵاتییانی ئەمریکی دروست کردووە.