رووداو- هەولێر بە زریكە دەستی بە نووسینی چیرۆكەكانی كرد، بەختی خۆی لە نووسینی دوایین رۆماندا بەناوی "گرەوی بەختی هەڵاڵە" تاقی كردەوە و ئەو رۆماننووس و چیرۆكنووسەی هێندەی دیكە ئاشنای خوێنەرانی كورد كرد. عەتا نەهایی، لە گفتوگۆیەكی تەلەفۆنیدا لەگەڵ رادیۆی رووداو، وەڵامی زۆر پرسیاری دایەوە. ئەو دەڵێ رۆمانێكی نووسیوە كە چەند ساڵێكە ئامادەیە بۆ چاپ، هەروەها دەڵێ كۆمەڵە چیرۆكێكیشی ئامادەیە، لەو گفتوگۆیەدا باسی هۆكارەكانی بڵاونەكردنەوەیان دەكات. رووداو: رەوتی چیرۆكنووسین لە رۆژهەڵاتی كوردستان چۆن دەبینی بەراورد بە پارچەكانی دیكەی كوردستان؟ عەتا نەهایی: رەوتی چیرۆكنووسین لە رۆژهەڵاتی كوردستان تەمەنێكی كەمتری هەیە لەچاو رەوتی چیرۆكنووسین لە باشووری كوردستان. رەنگە لە 20- 25 ساڵی رابردوودا دەستی پێكردبێت، یەكەم رۆمان كە بڵاوبووەوە رۆمانی "پێشمەرگە"ی رەحیمی قازییە، هەروەها یەكەم كۆمەڵە چیرۆكیش، كۆمەڵە چیرۆكی "زریكە"یە كە تەمەنی بڵاوكردنەوەیان لە 20 تا 23 ساڵ زیاتر نییە. ئەمە دەڵێم بۆ ئەوەی بڵێم كە كاروانی نووسین لە رۆژهەڵاتی كوردستان لە ماوەی ئەو چەند دەیەی رابردوو، لەگەڵ هەموو ئەو ئاستەنگ و بەربەستانەی لەسەر رێیەتی، بەهۆی ئەوەی كە بواری نووسین لە رۆژهەڵات زۆر كەم بووە، خوێنەری زۆر كەم بووە بەهۆی ئەوەی تا ئەمڕۆكەش خوێندنەوە و نووسینی كوردی لە رۆژهەڵاتی كوردستان شتێكی فەرمی نییە، بەهۆی ئەوەی كە مۆڵەتی چاپ كێشەی زۆرە، بەهۆی ئەوەی كە كەشی كولتووری و رۆشنبیری لەماوەی ئەو بیست و ئەوەندە ساڵەدا لەچەند قۆناغێكی جیادا زۆر داخراو بووە، بەڵام پێموایە كە ئەو رەوتە رەوتێكی پێشكەوتووە. كوڕە گەنجەكانی ئێمە، نووسەرانی ئێمە، بە تایبەت لە بواری چیرۆكدا، لە هەموو شارەكانی رۆژهەڵاتی كوردستان، توانیویانە بەو هەموو بەربەستانەوە كارەكانیان بڵاوبكەنەوە و سەرنجی بەشێكی زۆری خوێنەران رابكێشن. بەرهەمەكانیان نەك تەنیا لە رۆژهەڵات، بەڵكو لە باشووری كوردستانیش بڵاودەبێتەوە، تەنانەت بەشێكیان بەرهەمەكانیان وەرگێڕدراوەتە سەر زمانی فارسی. ئەمە ئەگەر خوێندنەوەیەكی گشتی بۆ بكەم، رەوتەكە بەرەوپێشە، هەڵبەت ئەوەش بڵێم كە خوێندنەوەیەكی ئاوا گشتی ناتوانێ ماف بداتە كارەكان، بەڵام بەشێك لە بەرهەمەكان باشن، هەندێكیشیان مامناوەندن و هەندێكی دیكەشیان لایەنی لاوازیان هەیە. رووداو: لە رۆژهەڵاتی كوردستان كۆمەڵێك كارخانەی چیرۆك و ئەنجوومەنی ئەدەبی هەن، سەرباری ئەوەی كە زمانی كوردی زمانی فەرمی نییە و سەرباری ئەو ئاستەنگانەی كە هەن، چ شتێكە گوڕ و تین دەداتە ئەو چالاكییە ئەدەبیانە؟ عەتا نەهایی: پێموایە ئەمە دوو هۆی هەیە، یەكەمیان: پەیوەندی بەو بڕیارە ئازایانەوە هەیە كە خەڵكی ئێمە لە رۆژهەڵاتی كوردستان داویەتی، بۆ ئەوەی شوناسێكی كولتووری بۆخۆی دەستەبەر بكات. دووهەمیشیان: بە بڕوای من سەركێشیی نووسەران، سەركێشیی رۆشنبیرانە كە توانیویانە سەرباری ئەو رەوشە بنووسن و بڵاوبكەنەوە، ساڵانە كۆڕ و كۆبوونەوە و دانیشتن، ساڵانە كۆڕی شیعر، ساڵانە ئەنجوومەنەكانی ئەدەب چالاكییان هەیە، ئەمە بەبڕوای من سەركێشیی رۆشنبیران و نووسەران بووە لە رۆژهەڵاتی كوردستان و سەركێشییەكی زۆر ئازایانەش بووە. هەروەها پشتگیریی تاڕاددەیەك باشی گەلی ئێمە لە رۆژهەڵاتی كوردستان. رووداو: ئەگەر بە رێژەییش قسە بكەین، پچڕانێك لەنێوان پارچەكانی كوردستاندا هەیە، ئەمە وایكردووە كە كەلێنێك لەنێوان پارچەكانی كوردستاندا پەیدا بێت، ئەمە ئەگەر بۆ هەردوو شێوەزاری كورمانجی و سۆرانی روونتر دیار بێت، بەڵام بۆچی لەنێوان باشوور و رۆژهەڵاتی كوردستانیش ئەو كەلێنە بەدی دەكرێت؟ عەتا نەهایی: راستی زۆر تێناگەم ئەو كەلێنە چییە! من پێموایە لەدوای راپەڕینەوە ئەو ئازادییەی لە باشووری كوردستان هەیە، ئەو هەموو بواری چاپ و بڵاوكردنەوەیە، ئەو هەموو گۆڤار و رۆژنامە و چاپ و پەخشە توانیویەتی خزمەتێكی زۆر بە رەوتی ئەدەبی لە رۆژهەڵاتی كوردستان بكات، واتە دەروویەكی لێ بكاتەوە، ئەمە لە كاتێكدا لە هەندێ لە قۆناغەكاندا داخرانێكی رۆشنبیری زۆر بە قایمی لێرە هەبووە، ئەو دەرووە، ئەو هیوایە كە نووسەرانی ئێمە بەتایبەت گەنجەكانمان دەتوانن لە باشووری كوردستان كارەكانیان چاپ و بڵاوبكەنەوە، پاڵنەرێكی باش بووە بۆ ئەو سەركێشیە و درێژە پێدانی. من كەلێنێك نابینم، راستە جیاوازییەك هەیە لەنێوان نووسین لەم پارچەیە و لە باشووری كوردستان كە ئەویش دەگەڕێتەوە بۆ سەرچاوەی خوێندەواریی نووسەرانی ئێمە لەو دوو پارچەیە، نووسەرانی ئێمە لە رۆژهەڵاتی كوردستان سەریان بە كتێبخانەی دەوڵەمەندی فارسییەوەیە، لە رێگەی ئەدەبی فارسییەوە ئاگاداری ئەدەبی جیهانیشن، هەروەها زەوقی ئەدەبیی نووسەرانی ئێمە زیاتر لە زەوقی ئەدەبیی نووسەرانی ئێران نزیكە، بەڵام لە باشووری كوردستان رەنگە زەوقی ئەدەبی بە ئاراستەیەكی تۆزێ جیاوازدا رۆیشتبێ. رووداو: بەوەی كە كوردستان بەسەر چوار دەوڵەتدا دابەش بووە، ئایا ئەمە زیانی لە زمان و رەوتی ئەدەبیی كوردی نەداوە و بەتەواوی نەكەوتووەتە ژێر كاریگەریی وڵاتانی سەردەست؟ عەتا نەهایی: دەبێ تۆزێ بە كراوەتر باسەكە بكەین، چونكە باسەكە پان و بەرینە، من پێموایە راستە زمانی كوردی لە هەر پارچەیەكی كوردستان لەژێر كاریگەریی ئەو دەوڵەتەیە، بۆ نموونە رۆژهەڵات زۆر لەژێر كاریگەریی زمانی فارسیدا بووە، هەروەها باكووریش و تا بەر لە راپەڕینیش لە باشوور، ئەو سنوورانە نەك هەر ئەمڕۆ، بەڵكو لە سەدەكانی رابردووشەوە بەربەستێك بوون بۆ ئەوەی ئەدەبی كوردی و شیعری كلاسیكی كوردیش لەیەك نزیك بن و نەتوانن كاریگەری و باندۆریان لەسەر یەكدی هەبێت، وەك دەزانین شاعیرێكی وەك مەولەوی هاوسەردەمی ژیانی نالی و كوردی بووە، بەڵام كاریگەرییان لەسەر یەكدی نەبووە، یان لە باكوور شیعرە كلاسیكەكانمان هەر بەم شێوەیە بووە. بەڵام بە بڕوای من لەم 20- 30 ساڵەی دواییدا رەوشەكە گۆڕاوە و تێكەڵاوییەكی ئەدەبی دروست بووە، لانیكەم ئاگادارییەكی ئەدەبی لە پارچەیەكەوە دروست بووە، لەگەڵ ئەوەش من پێموایە ئەو دابڕانە لایەنێكی پۆزەتیڤیشی هەبووە، ئەوەی كە ئەدەبی كوردی، هەر نەبێ ئەدەبی هاوچەرخی كوردی لەو یەك ئاستییە یان لەو یەك تیپییە دەربچێت و روانین بۆ شیعر، چیرۆك و رۆمان لە رۆژهەڵاتی كوردستان جیاوازتر بێت لە باشوور، ئەمە خۆی لە خۆیدا مەترسیی نییە، بەڵكو دەرفەتێكە كە نووسەران و رۆشنبیران لەهەر چوار پارچەی كوردستان دەتوانن بیكەنە دەرفەتێك بۆ دەوڵەمەندكردنی ئەدەبی كوردی، بۆ ئەوەی هەموومان بە چاوێك سەیری ئەدەب نەكەین. بۆ ئەوەی هەموو لە كانییەكی ئەدەب و سەرچاوەیەك نەخۆینەوە. ئەگەرچی زۆر نەمانتوانیوە ئەو دەرفەتە بقۆزینەوە، بەڵام لەو ئاستە كەمەشیدا من پێموایە بە لایەنی باشدا شكاوەتەوە. رووداو: لەماوەی ئەو 25 ساڵەی بڵاوكردنەوەی كتێب و نووسینی چیرۆك و رۆمان لە رۆژهەڵاتی كوردستان تۆ تاچەند لە رەوتی ئەدەبیی كوردی لە رۆژهەڵاتی كوردستان رازیت، ئایا هێندەی ژمارەی ساڵەكان توانیویەتی گەشە بكات؟ عەتا نەهایی: ژمارەی ئەو رۆمانانەی لە ماوەی 20 ساڵی رابردوودا چاپ و بڵاوكراونەتەوە، رەنگە زۆر نەبێت، بەڵام لەگەڵ ئەوەشدا، هەندێك بەرهەمی زۆر باشمان هەیە. پێموایە نەك هەر لە رۆژهەڵاتی كوردستان، بەڵكو لە پارچەكانی دیكەش ئەدەبی داستانی چیرۆك و رۆمان كە پەیوەندی بە دونیای سەردەمی مۆدێرنەوە هەیە جگە لە چەند بەرهەمێكی دەگمەن، پێویستە كاری زۆرتری لەسەر بكرێ، هێشتا لە ئاستی خۆزگە و خەونی نوخبەی ئەدەبیماندا نین. رووداو: لە ئێران بەگشتی سانسۆر لەسەر چاپ و بڵاوكردنەوەوە هەیە، ئەمە تاچەند كاریگەری لەسەر ئەدەبی كوردی هەبووە؟ عەتا نەهایی: سانسۆر لە ماوەی 100 ساڵی رابردوودا ژەهرێكە لە دەماری كولتووری ئێرانیدا بەگشتی، واتە لە 100 ساڵی رابردوودا هەموو حكومەتەكان زۆر بە جددی نووسینی كوردی و فارسییان سانسۆر كردووە، ئەم سانسۆرە تەنیا سانسۆری حكومەتی نەبووە، سانسۆری كۆمەڵایەتی و ئاینییشە، ئێمەی نووسەران و شاعیران هەمیشە شمشێری دیمۆكلیسی سانسۆر بەسەر سەرمانەوە بووە، چ بە وشیارانە چ سانسۆری خۆمان كە كۆمەڵگا و ئایین بەسەرماندا دەسەپێنێ. لەم 20 ساڵەی رابردوودا كەم بەرهەمی ئەدەبی جیهانی وەرگێڕدراوی فارسی هەیە كەم یان زۆر لێی نەقرتابێ و دەستی بۆ نەبردرابێ. بەڵام ئەو رۆمانانەی من تەرجەمەم كردوون وشە بە وشە بەراورد كراون لەگەڵ دەقە ئینگلیزییەكان. ئەگەر لەمەوە بیبەستمەوە بە پرسیاری دووەمت، بەداخەوە خوێنەری كورد لە رۆژهەڵاتی كوردستان زۆر نییە، لە ئێرانیشدا زۆر نییە، ئێستاش لە ئێرانێكی 70 ملیۆنیدا تیراژی كتێب لە چەند هەزار دانەیەك تێناپەڕێ و هی كوردییش لە 500 یان هەزار دانە زیاتر نییە. رووداو: ئێوە سەرەتا بە كۆمەڵە چیرۆكی "زریكە" دەستتان بە نووسین كرد، دواتر رۆمانتان نووسی، زۆربەی ئەو ئەدیبانەی كە دێنە نێو دونیای نووسینەوە بە شیعر دەستپێدەكەن، ئێوەش شیعرتان نووسیوە؟ عەتا نەهایی: منیش ئەو تاوانەم كردووە، لە سەرەتای گەنجیمدا بە شیعر دەستم پێكرد، هەر بەر لە شۆڕش، ئەو كاتەی 16- 17 ساڵ بووم، شیعرێكم نووسی، دوای شۆڕشیش چوار پێنج ساڵ شیعرم دەنووسی، چەند شیعرێكیشم بە ناوی خوازراوەوە لە گۆڤارە حیزبی و سیاسییەكانی ئەو سەردەمە بڵاوكردەوە، من ئەگەر لە زۆر شتدا ژیر نەبووبێتم، لەوەدا ژیر بووم كە زوو زانیم ناتوانم ببمە شاعیرێكی باش، واتە ئەو شاعیرەی كە خۆم چاوەڕوانم دەكرد، وازم هێنا و تاوم دایە چیرۆكی كورت. رووداو: سروشتی بانە وەك شارێكی بچووكی رۆژهەڵاتی كوردستان تا چەند رەنگدانەوە و كاریگەری لەسەر نووسینەكانت هەبووە؟ عەتا نەهایی: من لەو دەگمەن نووسەرانەم كە لە منداڵییەوە هەر لە بانەدا ژیاوم، لەو دەگمەن نووسەرانەشم كە 40 ساڵ لە ماڵێكدا ژیانم بەسەر بردووە، لەو دەگمەن نووسەرانەشم كە لەسەدا نەوەدی چیرۆك و رۆمانەكانم لە ژوورێكدا نووسیوە. بێگومان بانە وەكو شار، وەكو خەڵك كاریگەری لەسەر كارەكانم هەبووە، بەتایبەتی لە چیرۆكەكانی سەرەتامدا لە زریكە، بانە شارێكی جوانە، بەڵام من لەو كەسانە نیم كە جوانی و دیمەنی سروشتی كاریگەری زۆرم لەسەر بكا، من كەسێك بووم كە مامۆستایەتیم لێ سەندراوەتەوە، مافی خوێندنم لێ سەندراوەتەوە، گەڕاوم، لەنێو خەڵك كارم كردووە، كاسبیم كردووە، بێگومان ئەو دۆخە كاریگەری لەسەر من هەبووە، بەڵام نایشارمەوە لە بانە كاریگەریی كتێب لەسەر من زیاتر بووە. من هەمیشە گلەییەك لە چیرۆك و رۆمانی كوردی دەكەم كە شوێن ئامادەیی نییە، بەڵام لەگەڵ ئەوەشدا لە چیرۆكەكانی زریكە بەڕاستی شوێنەكان شاری بانەیە، سیتینگی رۆمانی "گرەوی بەختی هەڵاڵە" شاری بانەیە، رووداوەكان، بەتایبەت رووداوە مێژووییەكان بە شێوەیەك رووداوەكانی شاری بانەن، ئەگەرچی لە كارەكانی مندا ئەو شوێنەی هەیە شارێكی تایبەت نییە، ئەگەر لە رۆمانی "باڵندەكانی دەم با" كۆدەكانی دەمانباتەوە سنە، كە یەكێك لە گەورەترین شارەكانی كوردستانە. بەڵام دوای كۆمەڵە چیرۆكی زریكە هەوڵم دا جوگرافیای شوێن لە نووسینی خۆم فراوانتر بكەم. رووداو: تێگەیشتنێكی باو هەیە دەڵێ ئەدەبی داستانی ئەو ئەدەبەیە كە بەر شارە گەورەكان كەوتبێ، فرەجۆریی كار و پیشە و كاراكتەری تێدا هەبێت، ئێوەش لە بانەن، ئایا تا چەند دەكرێ ئەزموونی خوێندنەوە و خەیاڵكاری ئەو بەربەستە بشكێنێ؟ عەتا نەهایی: شتێك هەیە لای ئێمە بە هەڵە تێیگەیشتووین، بێگومان ئەدەبی داستانی ئەدەبی شارە، بەڵام ئەوە مانای ئەوە نییە كە دەبێ حەتمەن شوێنی چیرۆكەكان شار بێت، من ئێستا دەتوانم 10 رۆمانی زۆر باشی مۆدێرنتان بۆ بژمێرم كە چیرۆكەكە لە گوندێك روویداوە، بەڵام ئەوە حاشای لێ ناكرێ كە ئەدەبی داستانی بە تایبەتی رۆمان زیهنیەتی شارە، بەڵام زیهنیەتی شار بە مانای ژیان لەنێو شاری گەورەدا نییە، مرۆڤ دەتوانێ لە گوندێكیشدا بژی، بەڵام زیهنیەتێكی شاریی هەبێت. زیهنیەتی شاری واتە دابڕان لەو زیهنیەتەی بەر لە مۆدێرنە، واتە دابڕان لەو عەقڵیەتە كە هەموو شتەكان بۆ چاك و خراپ دابەش دەكات. پێموایە تاوەكو ئێستاش بەشێكی ئەدەبی ئێمە، چیرۆك و رۆمان، ئەگەر لە شارە گەورەكان دەنووسرێ، بە زیهنیەتی دیكارت و گالیلۆ و ئەنیشتاینەوە نانووسرێ، بەڵكو بە زیهنیەتێكی گوندییەوە دەنووسرێ. من هەوڵم داوە، ئەگەرچی لە بانەدا دەژیم، بەڵام تەنیا بە جەستە لە شارێكی بچووكدا بژیم. ئەوەندەی پێمكرابێت هەوڵم داوە بە خوێندنەوە، بە گەڕان، بە سەفەركردن و تێكەڵاوبوون لەگەڵ ژیانی خەڵك لە شارە گەورەكاندا لەو زیهنیەتە گوندییە داببڕێم، لەو هەموو روانینە قەتعیە و عەقڵیەتە دوالیزمە كە هەموو شتێك چاكە یان خراپە، هەوڵمداوە كەسایەتی دابهێنم، كەسانێك كە لەدەوروبەرماندا دەژین، هەوڵم داوە لە چیرۆك و رۆمانەكانمدا حوكم نەدەم، قەزاوەت نەكەم، ئەوەی من دەیڵێم قسەی تەواو نەبێت، هەوڵم داوە پەروەردەی گومان بكەم، هەموو شتێك لەژێر تەمێكی گوماندایە. من حەزم دەكرد لە كەركووك لەدایكبوومایە و بژیامایە، بۆچی؟ چونكە پڕە لە كولتووری جیاواز، ئاینی جیاواز، خەڵكی جیاواز، نەتەوەی جیاواز، یان لە كرماشان، یان لە ئامەد كە مێژوویەكی دوور و درێژی چەند هەزار ساڵەی شارستانیەتی هەیە، بەڵام ئەوە بەو مانایە نییە كە تەنیا دەكرێ لەو شارانە چیرۆك و رۆمان بنووسرێ. رووداو: بەدرێژایی مێژووی نووسینی خۆت لە زریكەوە تاوەكو گرەوی بەختی هەڵاڵە، تاچەند هەوڵت داوە خۆت وەك نووسەری ئەو بەرهەمانە بەر بەشێك لەو ئەزموونانە بكەوی كە دەیانكەی بە چیرۆك و رۆمان؟ عەتا نەهایی: هەموو چیرۆكنووسێك ئەزموونەكانی ژیانی خۆی، ئەزموونە زیهنیەكانی خۆی تێكەڵ دەكات لەگەڵ ئەزموونی داهێنەرانە و دەیكاتە بەشێك لە ئەزموونی ژیانی كاراكتەرەكانی، هەتا هەندێكجار خۆیشی نایناسێتەوە، منیش وەكو نووسەرێكی ئەزموونگەر، لەجیاتی ئەوەی دەربەستی ئەوە بم زیاتر كار بكەم، هەوڵم داوە لە هەر كتێبێكمدا ئەزموونێكی نوێ تاقی بكەمەوە، گرنگترین داڵغەم ئەوە بووە خۆم بنووسمەوە، بەڵام ئەوە ئەو عەتایە نییە كە لە بانە دەژی، خۆم ئەو عەتایە بەو زیهنیەتەوە كە رەنگە مەودایەكیشی ببێ لەگەڵ ئەو ژیانە واقیعیەی خۆمدا، هەوڵم داوە لە هەموو چیرۆكێكدا هەندێك لە خۆمی تێدابێت، ئەوە بەو مانایە نییە كە ئەو كەسایەتییانە خۆم بم، كەسانی دەوروبەرم بن، من لە چیرۆكەكانمدا زیاتر گرنگیم بە بارودۆخەكان داوە، رەنگە لە چیرۆكەكانی زریكە كەسایەتییەكان وەكو دەموچاو بناسمەوە، بەڵام نەهاتووم ژیانی خەڵكی بنووسمەوە. لێت ناشارمەوە رۆمانی "باڵندەكانی دەم با" نزیكترین رۆمانە لە خۆم، بەو مانایە نا كە نزیكترین رۆمانە لە ئەزموونی ژیانی رۆژانەی خۆم، بەڵكو نزیكترین رۆمانە بەو زیهنیەتەی خۆم، ئەو دڵەڕاوكانەی خۆم، ئەو داڵغانەی خۆم، داڵغەی كۆمەڵایەتی و عاتفیی خۆم. بەڵام لە هەندێك رۆماندا، لە "گرەوی بەختی هەڵاڵە" چونكە ئەزموونم نەبووە بۆ ژیان لەدەرەوەی وڵات، هەوڵم داوە زیاتر ئەزموونی هاوڕێكانم بنووسمەوە. رووداو: بەڵام گرەوی بەختی هەڵاڵە دوای سەفەرێكی ئێوە نووسرا بۆ دەرەوەی وڵات، دەكرێ سەفەر ئەزموونێكی گرنگ بێت بۆ نووسین؟ عەتا نەهایی: بێگومان یەكێك لە گرنگترین شتەكان سەفەركردنە، سەفەر دەرگای تازەت لێدەكاتەوە، كولتووری تازەت نیشان دەدا، رووبەڕووی روانین و دیدگای تازەت دەكاتەوە. رووداو: ئێوە لەپاڵ نووسینی خۆتان، ساڵانێكە كاری وەرگێڕانیش دەكەن، ئایا هیچ تایبەتمەندییەك لە پشت ئەو كتێبانەوە هەیە كە وەریاندەگێڕیتە سەر زمانی كوردی؟ لەگەڵ ئەوەشدا ماوەیەكی زۆرە هیچ كتێبی چیرۆك یان رۆمانمان نەگەیشتووەتە دەست كە خۆت نووسیبێتت، هۆكاری چییە؟ عەتا نەهایی: زۆر راستە من 10 ساڵە كتێبم بڵاونەكردووەتەوە، لە دوای "گرەوی بەختی هەڵاڵە" رۆمانم بڵاونەكردووەتەوە، بەڵام ئەو كەسانەی كە من لە نزیكەوە دەناسن، دەزانن من تەمبەڵ نیم، دیارە چاوەڕوانیی خوێنەرەكانم و چاوەڕوانیی خۆشم لەخۆم، وایكردووە كە حەزناكەم و ناشتوانم هەموو شتێك كە دەینووسم بڵاوی بكەمەوە، لەماوەی ئەو 10 ساڵەدا دانەنیشتووم، تەنیا وەرگێڕانیشم نەكردووە، خەرمانێكم نووسیوە، بەڵام پێموانییە هیچی بایی ئەوەندە بێت كە تێمپەڕاندووە لە بەرهەمەكەی پێش خۆی، دیارە بەراورد بە ئەزموونی خۆم نەك ئەزموونی كەسانی تر. ئێستاش ساڵانێكە رۆمانێكم تەواو بووە و چەند جارێكیش پێیدا چوومەتەوە، بەڵام تاوەكو ئێستا منی رازی نەكردووە، بێگومان تا منیش رازی نەكات، دڵنیام خوێنەرەكانی من رازی ناكات، كۆمەڵە چیرۆكێكم نووسیوە، هەرچەندە تاك و تەراش بڵاوم كردوونەتەوە، بەڵام ئەوە نییە بوێرم لە كتێبێكدا بڵاویان بكەمەوە.
هەواڵە ناوخۆییەکان25-06-2026پۆلیسی کەرکووک دەستگیرکردنی گومانلێکراوی رووداوێکی کوشتنی گەڕەکی پەنجا عەلی رادەگەیێنێت
.jpg&w=3840&q=75)
