رووداو - هەولێر
سەلیم بەرەكات بە عەرەبی دەنووسێ، بەڵام هەمیشە مژار و ناوەڕۆكی نووسینەكانی كوردین. دوایین رۆمانی بەرەكات كە ئەمساڵ لەلایەن دەزگای عەرەبی بۆ لێكۆڵینەوە و بڵاوكردنەوە چاپكراوە، لەبارەی ئەو كۆمەڵكوژییەیە كە لە ئابی 2014دا، لەلایەن جیهادییەكانی دەوڵەتی ئیسلامییەوە دەرحەق بە كوردی ئێزدی كرا.
رۆمانەكە بەناوی (سبایا سنجار) یان (كەنیزەكەكانی شنگال)ەو چیرۆكی ئەو ژنانە دەگێڕێتەوە كە لەلایەن چەكدارانی داعشەوە رفێنران و "سەبی" كران، واتە وەك تاڵانی و دەستكەوتی جەنگ مامەڵەیان لەگەڵ كرا، هەموو ئەمەش لە سەدەی بیست و یەكەمدا.
رۆمانەكە لە 445 لاپەڕە پێكدێ و بیست و سێیەمین رۆمانی سەلیم بەرەكاتە. نووسەر بە پێچەوانەی رۆمانەكانی پێشووی كە بە زمانێكی ئاڵۆز نووسراون، لەم بەرهەمەیدا زمانێكی سادە و ئاسانی بۆ گێڕانەوە بەكارهێناوە.
كاراكتەری سەرەكیی رۆمانەكە شێوەكاری كورد (سارات)ە كە لە سوێد نیشتەجێیە. سارات لە زۆر رووەوە لە سەلیم بەرەكات دەچێ، هەرچەندە بەرەكات نكۆڵی لەوە دەكات كە شێوەكار بێ، بەڵام دەستی وێنەكێشانی هەیە و خۆی وێنەی بەرگی زۆربەی بەرهەمەكانی دەكێشێ.
سەلیم بەرەكات رۆمانەكەی بەسەر 10 بەشدا دابەش كردووە، هەر بەشێك بەناوی تابلۆی یەكێك لە شێوەكارانی جیهانە. هەموو كارەكتەرەكانی رۆمانەكە، كەسانی مردوون. پێنج كچی ئێزدی بە ناوەكانی (شاهیكا، ئانیسا، نیناس، كیدیما و یادا) وەكو پەنابەر دەگەنە سوێد. پاشان چوار چەكداری قاڵبووی تاوانی كوشتن و تاڵان و سەبیكردن بە ناوەكانی (عەدنان، ئیحسان، عەلی و سەعدون) كە ئەندامی داعشن، لە نزیك ماڵی سارات نیشتەجێ دەبن.
سارات هەوڵ دەدات تابلۆیەكی چیای شنگال بكێشێ، بەڵام ئازاری داگیركردنی ناوچەی شنگال و دڕندەیی ئەوانەی داگیریان كرد، لەوە گەورەترە كە لەسەر پەڕۆیەكی سپی بنەخشێنرێ. ئەو هەرچەندی دەكات ناتوانێ وێنەی رۆژهەڵاتێكی بێسەروبەر لەنێو خوێن و كوشتندا بكێشێ. ناتوانێ ئێش و ناسۆری تاڵانكردن، دیلی، كوشتن و سەربڕین وێنە بكات.
سەلیم بەرەكات لە پەرەگرافێكی رۆمانەكەدا دەڵێت: "لە رۆژهەڵاتێك كە من لێوەی هاتووم، هیچ شتێك پێویستی بە دەستوورخواستن نییە، چەوساندنەوە و تەفروتوناكردنی گەلان پێویستی بە روخسەت نییە. خاپووركردنی وڵاتان پێویستی بە مۆڵەت نییە". لەبارەی رەنگی سپیی قوماشەكەی ساراتیشەوە دەڵێت: "سارات، چیای شنگال وەكو هەیە بكێشە. شنگال چیایەكی خەمگینە".
بەرەكات بە زمانێكی سادە و راستەوخۆ رەخنە لە دەوڵەتانی گەورەی وەكو رووسیا و ئەمریكا و وڵاتانی ناوچەكە بە تایبەتیش توركیا و ئێران دەگرێت. ئەوان وەكو هۆكاری ئەو بەڵا و كارەساتەی سووریا دەبینێ. بەتایبەتی رەخنە لە پشتگیریی رووسیا و ئێران بۆ سەرۆكی سووریا بەشار ئەسەد دەگرێ.
بەرەكات لەسەر دڕندەیی چەكدارانی خەلافەت دەوەستێ و لەلاپەڕە 139 – 140دا دەڵێت: "بانگخواز بە منداڵانی گوت: ئێستا ئێوە چی دەكەن؟ منداڵەكان بە یەك دەنگ وەڵامیان دایەوە: ئێمە كافر و بێدینان دەكوژین. بەڵام بانگخواز رووی گرژ دەكات و دەڵێت: ئێوە ئەوان وەها بە نەرمونیانی دەكوژن؟ منداڵەكان هار دەبن و دەڵێن: نەخێر، ئێمە سەریان بە چەقۆ لێدەكەینەوە. هەر یەك لە منداڵەكان چەقۆكانیان لە جانتاكانیان دەردێن".
لە بەشی كۆتایی رۆمانەكەدا لە ناكاو سەگێكی گەورە، پەلاماری ماڵی ساراتی شێوەكار دەدات و نێو ماڵەكەی سەراوبن دەكات. سارات رەنگە رژاو و تێكەڵبووەكان هەڵدەگرێتەوە و لە دیواری خانووەكەی دەدات. وەك ئەوەی بیەوێ رووی راستەقینەی ئەو قۆناغ و سەردەمە، ئاڵۆزی و كوشتنی لە راددەبەدەری ئەم رۆژهەڵاتە زامدارە، وێنە بكێشێ.
