نووسەری عەرەبینووسی بە رەچەڵەك كورد، سەلیم بەرەكات، رۆمانێكی تازەی بڵاوكردەوە. رۆمانە نوێیەكەی بەرەكات بەناوی "زئیر الڤلال فی حدائق زنوبیا"یە.
سەلیم بەرەكات كە لە رۆژئاوای كوردستان لەدایكبووە و ئێستا لە سوێد نیشتەجێیە، نووسەرێكی پڕ بەرهەمە، تاوەكو ئێستا بە دەیان رۆمان و گوتار و دیوانی شیعری نووسیوە. لە دوایین رۆمانیدا دەگەڕێتەوە بۆ شاری دیرۆكیی تەدمور لە سووریا و باسی چیرۆكی ژیان و مردنی شاژن زەنوبیا، شاژنی تەدمور دەكات.
دوای رۆمانی "سبایا سنجار" كە ماوەیەك لەمەوبەر چاپ و بڵاوكرایەوە، رۆماننووسی كورد كە بە زمانی عەرەبی دەنووسێ و جیهانی ئەدەبیاتی عەرەبی سەرسام كردووە، بەبێ وەستان درێژە بە ئەفراندن و داهێنانەكانی دەدات لە بواری ئەدەبیاتدا. وێستگەی ئەمجارەی بەرەكات، شاری تەدموری سووریایە و باس لە مێژووی كەڤناری ئەو شارە دەكات. ئەو شارە مێژووییە لە شەڕی شەش ساڵەی سووریادا، بەشی خۆی لە كاولكاری بەركەوت. شارەكە كە پڕیەتی لە شوێنەوار، ماوەیەك كەوتە ژێر دەستی چەكدارانی داعش و بەوهۆیەوە زیانێكی زۆر بەر شوێنەوارەكانی كەوت.
ئەم رۆمانە بیست و سێیەمین رۆمانی سەلیم بەرەكاتە كە لەلایەن دەزگای عەرەبی بۆ لێكۆڵینەوە و بڵاوكردنەوە، چاپ و بڵاوكراوەتەوە.
سەلیم بەرەكات لەو رۆمانەدا رۆدەچێتە نێو رۆژگاری شاژنی تەدمور، شاژنە زەنوبیا كە لەگەڵ ئیمپراتۆریەتی رۆمانی لە ململانێدا بوو. بە زمانە تایبەتەكەی خۆی خەیاڵی خوێنەر دەباتە نێو كوچە تاریكەكانی مێژووی رۆژهەڵاتی ناوەڕاست و سووریا كە تاوەكوو ئێستا گرێدراوی ئەو مێژووە تاڵەن.
لەو رۆمانەدا كە لە 580 لاپەڕە پێكدێ، بەرەكات نەك وەك دیرۆكنووس، لێ وەك رۆماننووس سەیری مێژوو دەكات. بەتایبەتی باسی پەیوەندیی نێوان ئیمپراتۆریەتی رۆمانی و پاڵمێرا (تەدمور) دەكات، هەروەها باسی چۆنیەتی بەدیلگرتن و كوشتنی زەنوبیا دەكات. وەكوو هەر جارێك زمانی بەرەكات لەو رۆمانەدا سیحراوی و جیاوازە، ئەو بەشێوەیەكی ناڕاستەوخۆ رووداوەكانی ئێستای سووریا دەبەستێتەوە بە رووداوە مێژووییەكانی ناوچەكە و تەدمور بە نموونە دێنێتەوە.
بەرەكات لە بەشێكی رۆمانەكەدا دەڵێت: " هیرۆدسی یەكەم تەمەنی 18 ساڵە. ئەو لە رۆما میوانی ئیمپراتۆر كلۆدیۆسی دووەمینە. ئەمە یەكێكە لە دابونەریتەكانی هاوپەیمانی لە نێوان ئیمپراتۆرەكاندا. ئەمان كوڕێكی ئەوان دەبەنە لای خۆیان، بۆ ئەوەی رێگە لە پیلانگێڕی و شكاندنی سۆز و بەڵێنەكان بگرن. ئۆدینازوس لێی پرسی: سنوورەكانی رۆما چین؟ سنوورەكانی خواوەندەكانی رۆما چین؟ ئەوكاتەی خواوەندەكان زۆر دەبن، هەڵبەت بۆ هەر خواوەندێك سنوورێك دروست دەبێ.
هەر ناوچەیەك دەبێتە موڵكی خواوەندێك. باكوور خواوەندێكی هەیە، رۆژهەڵاتیش خواوەندێك، هەروەها باشووریش. هەر چیایەك دەبێتە خاوەنی خواوەندێك، بە هەمانشێوە دەریا و رووبار و هەورەكانیش. ئەگەر تەنیا یەك خواوەند هەبێ، مرۆڤەكان یەكدی قڕ دەكەن بۆ ئەوەی ببنە خاوەنی ئەو خواوەندە، چونكە فرت و فێڵ و تەڵەكەبازییەكانی مرۆڤ كۆتاییان نایەت".
