شارۆچکەی قائیم لە مین و بۆمبە چێندراوەکانی داعش پاکدەکرێتەوە

رووداو - هەولێر 

شارۆچکەی قائیم لە باکووری رۆژئاوای عێراق، دەکەوێتە نزیک سنووری سووریا، هێزەکانی دژە تیرۆری عێراقی لەنێو شاردا دەسوڕێنەوە. لەنێو سەنتەری شاردا پاشماوەی تابلۆی داعش هێشتا ماون. جگە لە خانووی رووخاو سەربازی عێراقی، هیچ کەسێکی سڤیل نابینرێت.

عەبدوڵغەنی ئەلئەسەدی، فەرماندەی هێزەکانی دژە تیرۆری عێراقی دەڵێت "ئەمڕۆ یەکەکانمان ئەو کارانەیان تەواوکردن کە مابوون، رێگەی نزیک بانکی رووباری فوراتیان کردەوە، هەروەها کۆنترۆڵی سنووری رۆژئاوایان کرد، پێموایە لە ماوەی یەک کاژێری داهاتوودا پشکنینەکان بە کۆتایی دێن لە هەموو ناوچەکانی نێو شارەکە و دەوروبەری تەنانەت گوندەکانیش".

داعش لە شارەکە دەرکراوە و ئێستا تەنها هێزە عێراقییەکان لێرەن، بەڵام داعش لەدوای خۆی بەشێکی رێگە و خانووەکانی بۆمبڕێژکردووە، تیمەکانی دژە تیرۆری عێراقیش سەرقاڵی پووچەڵکردنەوەی ئەو بۆمبانە.

قائیم بەدوایین پێگەی داعش دادەنرا لە عێراقدا، بە لەدەستدانی ئەو ناوچەش، ئیدی داعش وەکو هێزێک لەسەر زەوی کۆتاییهات، تەنها کارێک لەمەودوا ئەگەر بتوانێت ئەنجامیبدات لەدژی هێزە عێراقییەکان و خەڵکی سڤیل، چالاکی ژێر زەمینیە.


پێداچوونەوە؛ راوچی حەسەن