رووداو - نیویۆرک
ئەنجوومەنی ئاسایشی نێودەوڵەتی کۆبوونەوەیەکی لەبارەی بارودۆخی هەرێمی راخین لە میانمار(بۆرما) ئەنجامدا، تێیدا بەتووندی توندووتیژییەکان و پێشێلکردنی مافەکانی مرۆڤی لەلایەن هێزە ئەمنی و سەربازییەکانی حکومەتی میانمار بەرامبەر موسڵمانانی رۆهینگیا سەرکۆنەکرد.
ئەنجوومەنی ئاسایش تەنیا تووندووتیژییەکانی سەرکۆنە نەکرد، بەڵکو لە راگەیێندراوێکدا داوای لە حکومەتی مینمار کرد هەنگاوی بەپەلە و جددی بنێت بۆ رێزگرتن لە مافەکانی مرۆڤ، ئەنجوومەنی ئاسایش هەروەها دەڵێت، ئەوەی روودەدات بەرنامە بۆ داڕێژراوە لە بەکارهێنانی هێز، لە دژی خەڵکی سڤیل.
سیبستیانۆ کاردی، باڵیۆزی ئیتاڵیا لە نەتەوە یەکگرتووەکان رایگەیاند: "ئەنجوومەنی ئاسایش بەتووندی تووندوتیژییەکانی ناوچەی راخین لە میانمار سەرکۆنە دەکات، کە لە 25ی ئابەوە بووەتە هۆی ئاوارەبوونی زیاتر لە 670 هەزار کەس لە موسڵمانانی رۆهینگیای، ئەنجوومەنی ئاسایش هەروەها نیگەرانی قوڵی خۆی لەبارەی پێشلکردنی مافەکانی مرۆڤ لەلایەن هێزەکانی سەر بە حکومەتی میانمارەوە لە هەرێمی راخین دەردەبرێت".
نوێنەری میانماریش لە نەتەوە یەکگرتووەکان رەخنەی لەو بڕیارەی ئەنجوومەنەکە گرت و پێیوابوو هەوڵەکانی حکومەتەکەی بۆ چارەسەرکردنی کێشەکان لەبەرچاونەگیراون.
هاو دو سوان، باڵیۆزی میانمار لە نەتەوە یەکگرتووەکان رایگەیاند: "ئێمە بەقووڵی نیگەرانین لەو راگەیێندراوەی تایبەت بە بارودۆخی میانمار دەرکراوە و پێمانوایە ئەو تۆمەتانە هەوڵدانێکی زۆرن بۆ راگرتنی باڵانس لەنێوان تێکستەکان و ئەوەی لەسەر زەوی هەیە، لەگەڵ ئەوەشدا باس لە هەوڵەکانی حکومەتی میانمار نەکراوە کە بۆ دەستنیشانکردنی بەربەستەکانی بەردەم چارەسەرکردنی کێشەکان لە هەرێمی راخین دەیانگرێتەبەر".
تەواوی کۆچبەرانی موسڵمانی رۆهینگیای دوای دەربەدەربوونیان لە زێدی خۆیان، روو لە بەنگلادیش دەکەن، نوێنەری بەنگلادیش لەو کۆبوونەوەیەدا هەوڵیدا باڵانسێک لەنێوان میانماری دراوسێی و گوشارەکانی رۆژئاوا بۆ چارەسەرکردنی کێشەکە رابگرێت.
مەسعود بن مومین، باڵیۆزی بەنگلادیش لە نەتەوە یەکگرتووەکان گوتی: "ئەو گوتانەی ئێستا لەلایەن هاوتا میانمارەکەمەوە پێشکەشکران، ئەوەمان پێدەڵێت کە ئەو بارودۆخە ئاڵۆزە و نابێت بەربەستەکانیش بۆ چارەسەرکردن نادیدەبگیرێن و رەتبکرێنەوە".
کۆبوونەوەکەی ئەنجوومەنی ئاسایش و راگەیێندراوە تووندەکەی دژی حکومەتی میانمار، بە دەستپێشخەری بەریتانیا و فەرەنسا بوو، وڵاتانی دیکەش پشتیوانییان کرد، بەڵام چین کە هاوپەیمانێکی گرنگی میانمارە، دژی هەر هەنگاوێک دەوەستێتەوە لەبەرامبەر میانمار بنرێت، چین مافی ڤیتۆشی هەیە و توانای پووچەڵکردنەوەی بڕیارەکانی هەیە.
پێداچوونەوە: دەرباز ساڵح
.jpg&w=3840&q=75)
