ترەمپ: زەیدی زۆر باش نوێنەرایەتیی عێراقییەکان دەکات

رووداو دیجیتاڵ

شاندی عێراق بە سەرۆکایەتیی عەلی زەیدی، سەرۆکوەزیرانی عێراق گەیشتنە کۆشکی سپی و لەلایەن دۆناڵد ترەمپ، سەرۆکی ئەمریکاوە پێشوازییان لێکرا. ترەمپ لەبارەی عێراقەوە رایگەیاند، زۆر عێراقی خۆشدەوێ. 

رۆژی سێشەممە، 14ی تەممووزی 2026، سەرۆکوەزیرانی عێراق گەیشتە کۆشکی سپی و لەلایەن سەرۆکی ئەمریکاوە پێشوازی لێکرا. سەرۆکی ئەمریکا لە وەڵامی رۆژنامەڤاناندا رایگەیاند، "عێراقم خۆشدەوێ. ئەو (زەیدی) هەڵبژاردنی بردووەتەوە و عێراقییەکان لەلایەن ئەوەوە زۆر باش نوێنەرایەتیی دەکرێن". 

دوێنێ سەرۆکوەزیرانی عێراق بەرەو واشنتن دی سی بەڕێکەوت و ژمارەیەک بەرپرس و نوێنەری پێکهاتەکانیشی لەگەڵ دایە. هەروەها، عەلی جاف، بەڕێوەبەری بەشی پەیوەندییە گشتییەکانی رووداویش لە گەشتەکەدایە. 

سەرۆکوەزیرانی عێراق بە ژمارەیەک دۆسیەی گرنگ و هەستیارەوە چووەتە واشنتن، دیارترینیان پرسی چەککردنی میلیشیاکان و هاوئاهەنگییە ئابوورییەکانی نێوان واشنتن و بەغدایە. 

ڤیکتۆریا تەیلەر، جێگری پێشووی وەزیری دەرەوەی ئەمریکا بۆ کاروباری عێراق و ئێران ئەمڕۆ بە رووداوی راگەیاند، ئەمریکا وەبەرهێنانی سیاسی لە حکومەتی ئێستای عێراقدا دەکات، بەڵام بەبێ داواکاریش نابێت.