رووداو دیجیتاڵ
ستیڤ ویتکۆف و جارێد کوشنەر، نێردەکانی سەرۆکی ئەمریکا بۆ کاروباری رۆژهەڵاتی نێوەڕاست و جەنگی ئۆکراینا، لە بەرلین لەگەڵ شێخ محەممەد بن عەبدولڕەحمان ئال سانی، سەرۆکوەزیرانی قەتەر کۆبوونەوە بۆ تاوتوێکردنی هەوڵەکانی نێوەندگیریی نێوان واشنتن و تاران.
کۆبوونەوەکە رۆژی پێنجشەممە 19-11-2026 بەڕێوەچوو و تاوەکو ئێستا کۆشکی سپی لەسەر ناوەڕۆکی کۆبوونەوەکە هیچ لێدوانێکی نەداوە.
قەتەر کە نێوەندگیرێکی سەرەکیی نێوان ئەمریکا و ئێرانە، چەندین هەفتەیە کاردەکات بۆ دەستپێکردنەوەی دانوستاندن و رێگریکردن لە گەڕانەوە بۆ جەنگ.
لە لایەکی دیکەوە، ئەمڕۆ هەینی 20-11-2026 دۆناڵد ترەمپ، سەرۆکی ئەمریکا لە کۆنفرانسێکی رۆژنامەڤانیدا لەبارەی تارانەوە گوتی: "ئێران دەیەوێ رێککەوتن بکات. ئێمە دەمانەوێ رێککەوتنێکی راستەقینە بکەین، نەوەک رێککەوتنێکی ساختە کە 51 ساڵە دەیکەن... ئەوان 51 ساڵە خەڵک دەخەڵەتێنن".
ترەمپ سەرکردایەتیی ئێرانی بە "شێت" و "گرووپێکی زۆر شەڕەنگێز" ناوبرد و جەختی کردەوە کە "نابێت رێگەیان پێبدرێ ببنە خاوەنی چەکی ئەتۆمی."
هەوڵی ئیسرائیل و بڕیارەکەی ترەمپ
9ی مانگ، سەرۆکوەزیرانی قەتەر سەردانی واشنتنی کرد و لەگەڵ ترەمپ و جەی دی ڤانس، جێگری سەرۆکی ئەمریکا پرسی ئێرانیان تاوتوێ کرد. دوای ئەو کۆبوونەوەیە ترەمپ رایگەیاند کە ئۆپەراسیۆنی سەربازیی نوێ بۆسەر ئێران "زۆر دوورە" و "پێناچێت پێویست بێت."
دوێنێ پێنجشەممەش ترەمپ لە هەڤپەیڤینێکی تەلەفۆنیی کورتدا بە ئەکسیۆسی گوت کە تاوەکو ساڵی نوێ بڕیار لەسەر هەنگاوی داهاتووی لە جەنگەکەدا نادات.
سەرۆکی ئەمریکا گوتی: "پەلە ناکەم لە هیچ بڕیارێک [لەبارەی ئێرانەوە]؛ با بزانین دوای سەری ساڵ چی روودەدات."
جووڵە دیپلۆماسییەکانی پشت پەردە
بە گوێرەی زانیارییەکانی دیپلۆماتکارێکی ئاگادار، هەفتەیەک لەمەوبەر سەرۆکوەزیرانی قەتەر لە تورکیا لەگەڵ عەباس عێراقچی، وەزیری دەرەوەی ئێران کۆبووەتەوە و نێوەڕۆکی گفتوگۆکانی لەگەڵ ترەمپ و ڤانس پێ راگەیاندووە و باسیان لە رێگاکانی شکاندنی بنبەستی دانوستاندنەکان کردووە.
لە سەرەتای ئەم هەفتەیەیشدا شاندێکی تەکنیکیی ئێران سەردانی دەوحەی قەتەری کرد بۆ هەمان مەبەست؛ هاوکات عێراقچی سەردانی پاکستان و عومانیشی کرد بۆ تاوتوێکردنی هەوڵەکانی گەیشتن بە چارەسەرێکی دیپلۆماسی.
سەرچاوەکان ئاماژە بەوە دەکەن کە سەرەڕای ئەو هەموو کۆبوونەوە و پەیوەندییانە، هێشتا هیچ پێشکەوتنێکی بەرچاو بەدەست نەهاتووە.



