هەڵەیەک روویدا! دووبارە هەوڵبدە
رووداو - تەندروستی
لەپێناو پێشگیری لە بڵاوبوونەوەی هۆکارێکی نەخۆشی بە ناوی 'سالمۆنێلا' وەزارەتی کشتوکاڵی ئەمریکا مەرجە تەندروستییەکان لەسەر گۆشت و مریشک تووندتر دەکات.
ئەمڕۆ دووشەممە 29ـی تەممووزی 2024 وەزارەتی کشتوکاڵی ئەمریکا رایدەگەیێنێت، کۆمپانیاکانی پەلەوەر دەبێت پشکنینی رێژەی بەکتریای سالمۆنێلا بۆ هەموو پەلەوەرەکانیان بکەن و پشکنین بۆ شەش جۆری جیاوازی بەکتریاکەش بکەن.
بە گوتەی بەرپرسانی وڵاتەکە، ئەگەر رێژەی بەکتریاکە لە ئاستی ئاسایی نەبێت و جۆرە مەترسیدارەکانی بەکتریاکە لەنێو گۆشتەکە بدۆزرێنەوە ئەوا بەرهەمەکە دەکشێندرێتەوە و کۆمپانیای بەرهەمهێنەریش هۆشیار دەکرێتەوە.
د. ئیمیلیۆ ئیستبان، یاریدەدەری بەرپرسی وەزارەتی کشتوکاڵ بۆ سەلامەتیی خۆراک دەڵێت: ''ساڵانە زیاتر لە ملیۆنێک کەس تووشی بەکتریای سالمۆنێلا دەبن، ئەم رێکارانەش وادەکەن نەخۆشییەکە کەمببێتەوە''.
د. ئیمیلیۆ ئیستبان بە پێویستی دەزانێت کێڵگە پەلەوەرییەکان پڕۆگرامێکی تایبەت پەیڕەوبکەن بۆ پێشگیریکردن لە بەکتریا و هۆکاری نەخۆشیی لەکاتی سەربڕینی بەرهەمەکانیان بە تایبەتیش کار بۆ کەمکردنەوەی پیسبوون بە بەکتریای سالمۆنێلا بکەن.
لەم بارەیەوە مارتن باکناڤاج، پسپۆڕی خۆراک لە ویلایەتی پێن ستەیت دەڵێت: ''شکنین بۆ سالمۆنێلا کارێکی ئاسان نییە و جێبەجێکردنی مەرجە نوێیەکان پێویستی بە کاتێکی زۆرە''.
بە گوێرەی ناوەندی کۆنتڕۆڵ و پێشگیریکردن لە نەخۆشییەکان CDC لە ئەمریکا، ساڵانە ملیۆنێک و 35 هەزار تووشبووی سالمۆنێلا تۆماردەکرێن؛ لەو ژمارەیەش زیاتر لە 400ـیان گیانلەدەستدەدەن.
رێگەکانی خۆپاراستن لە بەکتریای سالمۆنێلا ''گرانەتا''
- شۆردنی بەردەوامی دەستەکان پێش و دوای توالێت.
- خاوێنکردنەوەی کەلوپەلەکانی ئامادەکردنی خۆراک.
- باش کوڵاندنی گۆشت.
- هەڵگرتنی گۆشت لەپلەی گەرمیی گونجاو و دوور لە پلەی گەرمیی بەرز.
- کەمکردنەوەی بەرکەوتن لەگەڵ ئاژەڵ.
- مەلە نەکردن لەنێو ئاوی پیس و ئاوێک کە نەزاندرێت سەرچاوەکەی کوێیە.
- بەکارنەهێنانی کەلوپەلی کەسانی تووشبوو.
- خواردنەوەی ئاوی خاوێن و پاکژکراو لە وەرزی هاوین.
کێن ئەوانەی گرووپی مەترسیدارن بۆ گرانەتا؟
- منداڵانی خوار پێنج ساڵان
- بەساڵاچووان
- ئەوانەی چاندنی گورچیلەیان بۆ کراوە
- تووشبووانی نەخۆشییە درێژخایێنەکان وەکو 'شەکرە، بەرزەپەستانی خوێن و شێرپەنجە''
- ئاژەڵدارەکان
- پزیشکانی ڤێتێرنەری
نیشانەکانی گرانەتا؛
- تای بەهێز
- سەرئێشە
- ئازاری ماسوولکە
- بێهێزی
- کۆکە
- نەمانی ئارەزووی خواردن
- سکچوون
بە گوتە پسپۆڕان نابێت بەبێ راوێژی پزیشکی پسپۆڕ هیچ دەرمانێک بەکاربهێندرێت، چونکە دەشێت ئەو نیشانانە نەخۆشی دیکە بن، لەبەر ئەوەی زۆربەیان تایبەت نین بە گرانەتا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ